ნეტგაზეთი ამერიკის შეერთებული შტატების საელჩოზე დაყრდნობით ავრცელებს ინფორმაციას, თუ რატომ გაუუქმა პრეზიდენტმა ჯო ბაიდენმა შეხვედრა საქართველოს პრემიერ-მინისტრს ირაკლი კობახიძეს.

საელჩოს ცნობით, ირაკლი კობახიძეს გაეროს გენერალური ასამბლეის ყოველწლიურ მიღებაზე უარი ეთქვა საქართველოს მთავრობის ანტიდემოკრატიული ქმედებების, დეზინფორმაციისა და ნეგატიური რიტორიკის გამო.

"ბაიდენის ადმინისტრაციამ გააუქმა პრემიერ-მინისტრ კობახიძის მოწვევა გაეროს გენერალური ასამბლეის ყოველწლიურ მიღებაზე და უარი თქვა ქართულ დელეგაციასთან შეხვედრაზე საქართველოს მთავრობის ანტიდემოკრატიული ქმედებების, დეზინფორმაციისა და ნეგატიური რიტორიკის გამო შეერთებულ შტატებსა და დასავლეთზე", — განუცხადეს ნეტგაზეთს აშშ-ის საელჩოში.

შეგახსენებთ, დღეს, ამერიკის ხმამ გაავრცელა ინფორმაცია, რომ ბაიდენის ადმინისტრაციამ ირაკლი კობახიძეს მიღებაზე მიწვევა გაუუქმა.

გარდა ამისა, ადმინისტრაციამ ასევე უარი თქვა საქართველოს დელეგაციასთან ყველა შეხვედრაზე. პრემიერ-მინისტრ კობახიძესთან შეხვედრაზე, ასევე უარი თქვა ჯეიკ სალივანმა, თეთრი სახლის ეროვნული უსაფრთხოების მრჩეველმა.