დიდი ხნის ლოდინის შემდეგ, როგორც იქნა, სტივენ კინგის რომანის, The Dark Tower-ის ეკრანიზაცია გამოვიდა, რომელშიც მთავარ როლებს მეთიუ მაკკონაჰი და იდრის ელბა ასრულებენ.

რომანების სერია, ისევე როგორც მისი ეკრანიზაცია, თავის თავში ფენტეზის, სამეცნიერო ფანტასტიკის, ჰორორისა და ვესტერნის ჟანრებს აერთიანებს.

სიუჟეტის ერთ-ერთი მთავარი პერსონაჟი განსლინგერია (მსროლელი), რომელიც კოშკისკენ მის თანამგზავრ, ჯეიკ ჩემბერსთან ერთად მოგზაურობს. ბიჭი ახალ სამყაროს აღმოაჩენს და გადაწყვეტს სამყარო იმ საფრთხისგან დაიცვას, რომელსაც მილიარდობით ადამიანის განადგურება მოჰყვება.

ფილმში მეთიუ მაკკონაჰი განსლინგერის მთავარ მეტოქეს თამაშობს.

მიუხედავად იმისა, რომ მოლოდინი დიდი იყო, ფილმი მწვავე კრიტიკის ობიექტი გახდა.

მაგალითად, The Wrap-ის კინოკრიტიკოსი დენ კალაჰენი წერდა, რომ ფილმი სრულიად გაუგებარი და დამახინჯებულია.

სხვადასხვა გამოცემები კი წერდნენ, რომ ფილმი საკმაოდ მარტივი და არაფრისმთქმელი ეკრანიზაციაა, რომელსაც საფუძვლად შთამბეჭდავი და საკმაოდ რთული ლიტერატურული ნამუშევარი უდევს.

დღეს ცნობილი გახდა, რომ კინგის ნაწარმოებზე ფილმის შემდეგ სერიალსაც გადაიღებენ. ინფორმაცია ამის შესახებ პროდიუსერმა და სცენარისტმა გლენ მაზარამ გაავრცელა.

მაზარა ცნობილია ისეთი შოუების სცენარის ავტორობით, როგორებიც არის - Criminal Minds, The Walking Dead და Damien, რაც გარკვეულწილად იძლევა იმის გარანტიას, რომ ბნელი კოშკის სცენარი, რომელსაც ის დაწერს, საინტერესო გამოვა.

ჯერ-ჯერობით უცნობია, როდის დაიწყებენ მუშაობას კინგის რომანის ახალ ეკრანიზაციაზე, ან ვინ ითამაშებს მთავარ როლს შოუში, თუმცა ვრცელდება ინფორმაცია, რომ ფილმისგან გასხვავებით, სერიალში ყურადღება მთავარი გმირის ახალგაზრდობის პერიოდზე გაკეთდება.