"უკანონოა სახლში გატანება ნებისმიერი ნივთის, არ აქვს მნიშვნელობა — ერთი წლის იქნება, თუ სამი მილიონის", — ამის შესახებ NEWS.On.ge-სთან თსუ-ს არქეოლოგიის სასწავლო-სამეცნიერო ინსტიტუტის ხელმძღვანელმა, ვახტანგ ლიჩელმა, რუსულენოვანი ტურ-ოპერატორის, take and hike-ის მიერ ოკაცეში პალეონტოლოგიური ტურის დაგეგმვასა და მოპოვებული არტეფაქტების ტურისტებზე გასხვისებაზე, კომენტირებაზე განაცხადა.

მისი თქმით, "კულტურული მემკვიდრეობა ეკუთვნის სახელმწიფოს, ამიტომ მისი მითვისება უკანონოა".

"უკანონოა სახლში გატანება ნებისმიერი ნივთის რაც არ უნდა იყოს, გინდა ერთი წლის იქნება თუ 3 მილიონის, არ აქვს მნიშვნელობა. ტურ-ოპერატორებისთვის მსგავსი ტიპის საქმიანობაზე ლიცენზიის გაცემა კულტურული მემკვიდრეობის დაცვის ეროვნული სააგენტოს პრეროგატივაა, ის განაგებს კულტურულ მემკვიდრეობას საქართველოში.

კულტურული მემკვიდრეობა ეკუთვნის სახელმწიფოს, ამიტომ მისი მითვისება უკანონოა“, — აცხადებს ვახტანგ ლიჩელი.

არქეოლოგ გიორგი ბიძინაშვილის თქმით, ბუნების ძეგლიდან რაიმეს მოპოვებას დანაშაულია და არ შეიძლება უკანონოდ არც მოპოვება არც ხალხში წაღება.

“რაც შეეხება ბუნების ძეგლიდან რაიმეს მოპოვებას ეს დანაშაულია ნამდვილად. არ შეიძლება უკანონოდ არც მოპოვება არც სახლში წაღება”, — აცხადებს არქეოლოგი გიორგი ბიძინაშვილი.

შეგახსენებთ, რომ Facebook-ჯგუფი take and hike, რომელსაც რუსულენოვანი კონტენტი აქვს, ტურისტებს საქართველოში სხვადასხვა მიმართულებით ტურებს სთავაზობს.

ერთ-ერთი მათგანი — ოკაცეს ტური პალეონტოლოგიურ ექსკურსიას გულისხმობს, სადაც ტურისტებს არქეოლოგიური გათხრების ჩატარებას და ცარცული პერიოდის არტეფაქტების — ბელემნიტების, ამონიტების და უძველესი მოლუსკების მოპოვებას სთავაზობენ. იქვე ვკითხულობთ, რომ თუ ტურისტს ძალიან გაუმართლა, ზღვის რეპტილიის ძვლებსაც იპოვის. საიტზე მითითებულია, რომ ეს არტეფაქტები 110-120 მილიონი წლითაა დათარიღებული.

არქეოლოგიური ტური 1 პერსონაზე 180 ლარი ღირს. საიტზე ნათქვამია, რომ ტურისტებს შეუძლიათ ნაპოვნი ნივთები დაიტოვონ, ან მათივე მუზეუმს გადასცენ.

შეგახსენებთ, რომ ცარცული პერიოდი დედამიწის ისტორიის მეზოზოური ერის მესამე პერიოდია. რადიოლოგიური მეთოდით დადგენილია, რომ ამ პერიოდის ხანგრძლივობა დაახლოებით 70 მლნ წელს შეესაბამებოდა.

NEWS.On.ge-მ საქართველოს ტურიზმის ეროვნული ადმინისტრაციას და კულტურული მემკვიდრეობის დაცვის ეროვნული სააგენტოს მიმართა კითხვით, რამდენად კანონიერია არქეოლოგიური ტურის დაგეგმვა, ტურის ფარგლებში არტეფაქტების მოძიება და ტურისტებისთვის გადაცემა, თუმცა ამ დრომდე პასუხი არ მიუღია.

NEWS.On.ge აგრძელებს თემაზე მუშაობას.