მედიაომბუდსმენის ანგარიშის თანახმად, 2023 და 2024 წლებში რუსული კანონის საწინააღმდეგო აქციების გაშუქებისას, საქართველოს პარლამენტში მომუშავე: 12 ჟურნალისტის, 4 ოპერატორისა და 1 ფოტოჟურნალისტის უფლებების შეზღუდვის და დარღვევის 19 შემთხვევა გამოვლინდა.

ანგარიშში ასევე ნათქვამია, რომ ჟურნალისტების სამუშაო გარემო საქართველოს პარლამენტში უფრო და უფრო მძიმდება.

მედიის წარმომადგენლების უფლებების დარღვევის შემთხვევებიდან 3 პარლამენტის შენობიდან გამოძევების ფაქტია, 3 პარლამენტის წევრის ეთიკური ნორმების სავარაუდო დარღვევა, ხოლო 12 აკრედიტაციის შეჩერება (აქედან 1 სახდელის განმეორებით დაკისრება).

ანგარიშში ვკითხულობთ, რომ რომ პარლამენტის შენობაში, უმრავლესობის დეპუტატების ინიციატივით, შეზღუდვები და ხელოვნური ბარიერები გამოყენებული იყო დამოუკიდებელი და კრიტიკული სარედაქციო პოლიტიკის მქონე მედიასაშუალებების გადამღები ჯგუფების მიმართ. სახდელის დაკისრების ინიციატორები იყვნენ მმართველი პარტიის “ქართული ოცნების” დეპუტატები და საქართველოს პარლამენტის აპარატი.

მედიაინციდენტები ტელეკომპანიების მიხედვით ასე ნაწილდება:

ტელეკომპანია პირველი - 5 შემთხვევა;

ფორმულა - 5 შემთხვევა;

მთავარი არხი - 4 შემთხვევა;

On.ge - 1 შემთხვევა;

პუბლიკა - 1 შემთხვევა;

ნეტგაზეთი/ბათუმელები - 1 შემთხვევა.

მედიაომბუდსმენის ანგარიშის მიხედვით, 2024 წლის 1 აპრილიდან 2024 წლის 1 აგვისტომდე საქართველოს პარლამენტის სასახლეში მუშაობის შესაძლებლობა მიეცა მედიის 2829 წარმომადგენელს. მათგან, 1160-ზე გაიცა სპეციალური აკრედიტაცია (ერთჯერადი საშვი), ხოლო პარლამენტში აკრედიტებულმა 1669-მა პირმა ისარგებლა აკრედიტაციის ბარათით.”