კომუნიკაციების კომისიამ არაწინასაარჩევნო პერიოდში ვიდეორგოლის გავრცელების გამო, სადაც ნახსენები იყო "რუსული კანონი", მთავარი არხი 2500 ლარით დააჯარიმა.

GDI-ის ინფორმაციით, კომისიამ რუსული კანონის ხსენება, ქართული ოცნებისთვის ხელისშემშლელ პოლიტიკურ რეკლამად მიიჩნია.

საქმე ეხება მთავარი არხის ეთერში განთავსებულ ორ ვიდეორგოლს:

პირველ ვიდეორგოლში ნახსენებია, რომ საქართველოს ევროინტეგრაცია ნაკლებად პოპულარული იყო ეთნიკური უმცირესობით დასახლებულ რეგიონებში, თუმცა სამოქალაქო სექტორის კვლევით დამტკიცდა, რომ ეს ყველა რეგიონზე არ ვრცელდება და სტერეოტიპების დარღვევას ეთნიკურად აზერბაიჯანული მედია ებრძვის.

ვიდეორგოლის ბოლოს აღნიშნულია: "რამდენადაც მარტივია მაგალითების პოვნა რა სიკეთე მოუტანა დასავლურმა ცოდნამ და დახმარებამ სამოქალაქო საზოგადოებას საქართველოში, იმდენად მარტივია დანახვა რა საფრთხე დაემუქრა საზოგადოების ყველა ნაწილს რუსული კანონის ამოქმედებით".

მეორე ვიდეორგოლში, ნიაზ დიასამიძის სიმღერის ფონზე ნაჩვენებია კადრები რუსული კანონის წინააღმდეგ გამართული აქციებიდან, რის შედეგადაც ჩანს ლოგო: "კი — ევროპას, არა — რუსულ კანონს".

კომისია ამბობს, რომ აღნიშნულ ვიდეორგოლებში, მაყურებლისადმი ნეგატიურ კონტექსტში არის მიწოდებული "უცხოური გავლენის გამჭვირვალობის შესახებ" კანონი. და მოხსენიებულია, როგორც "რუსული კანონი".

კომისიის მოხსენებითი ბარათის თანახმად, “ცნობილია, რომ კანონის ინიციატორი და მიმღები იყო მმართველი პარტია და შესაბამისად ვიდეორგოლის მიზანია ქართული ოცნების არჩევის ხელშეშლა მომავალ არჩევნებში".

მთავარი არხი განმარტავს, რომ სადავო ვიდეორგოლები განთავსებული იყო არა პოლიტიკური, არამედ სოციალური რეკლამის სტატუსით, რომლის მიზანიც იყო საზოგადოებისთვის მნიშვნელოვან საკითხებზე, განსაკუთრებით კი ევროინტეგრაციაზე ყურადღების გამახვილება.

მთავარი არხი ასევე ამტკიცებს, რომ თუ მასში არც ერთი პოლიტიკური პარტია არაა ნაჩვენები/ნახსენები, მაშინ ვიდეოები ვერ ჩაითვლება პოლიტიკურად.

მთავარი არხის წარმომადგენლემა ყურადღება გაამახვილა იმაზეც, რომ კანონი თავად მას, მაუწყებელსაც ეხება და შესაბამისად მაუწყებელს სრული უფლება აქვს დააფიქსიროს საკუთარი სარედაქციო პოზიცია/აზრი ამ კანონთან დაკავშირებით, მათ შორის მას უწოდოს “რუსული”, ხოლო დაუშვებელია კომუნიკაციების კომისია ჩაერიოს გამოხატვის შინაარსში.