ინგლისელმა მუსიკოსმა კეიტ ბუშმა 1985 წელს გამოუშვა თავისი მეხუთე სტუდიური ალბომი, Hounds of Love, რომელიც მის საუკეთესო ნამუშევრად ითვლება. ალბომში შედის სიმღერა Running Up That Hill (A Deal With God), რომელიც ნეტფლიქსის პოპულარულ სერიალ Stranger Things-ში გაჟღერების შემდეგ მსოფლიო ჰიტი გახდა და არაერთი ქვეყნის ჩარტების სათავეშიც აღმოჩნდა.

თუკი Hounds of Love-ის მოსმენას დაიწყებ, ალბომის დასასრულს შენს ყურადღებას ნაცნობი, ქართული მელოდია მიიქცევს. ეს წინწყაროა — ქართლ-კახური სატრფიალო სიმღერა — რომლის ნაწყვეტები ბუშის ალბომის მე-11 ტრეკში, Hello Earth, ჟღერს. სიმღერას კეიტი "დედამიწის იავნანას" უწოდებს. თუმცა, კომპლექსური ფორმის, პოეტური ტექსტისა და სხვადასხვა ჟანრის ელემენტების მქონე ეს კომპოზიცია არცთუ ადვილი დასაწერი ყოფილა, მის დასრულებაში კი, როგორც აღმოჩნდა, ინგლისელ მუსიკოსს სწორედ ქართული ხალხური სიმღერა დახმარებია.

"Hello Earth ძალიან რთულად დასაწერი სიმღერა იყო, რადგან, რაღაც მხრივ, ჩემთვის მეტისმეტად მასშტაბური გახლდათ", — ჰყვება ბუში 1992 წლის ინტერვიუში, — "საბოლოოდ, ხელთ მქონდა სიმღერა, რომლის მისამღერებშიც ორი უზარმაზარი სიცარიელე იყო. იმ მომენტში, როცა დრამები და სხვა ყველაფერი ჩერდება, მეკითხებოდნენ, აქ რა უნდა მოხდესო. მე კი პასუხი არ მქონდა. მთელი სიმღერა მზად იყო, ყველაფერი გვქონდა, მაგრამ მისამღერში ეს სიცარიელეები მაინც რჩებოდა. ვიცოდი, რომ მათ ამოსავსებად რაღაც მჭირდებოდა და ვიფიქრე, ვოკალურ ნაწარმოებს გამოვიყენებ-მეთქი. ფილმში ნოსფერატუ ერთ ტრადიციულ მელოდიას მოვკარი ყური. ყველაფერი, რაც მანამდე მომაფიქრდა, ამ მელოდიის გვერდით ნაგავს ჰგავდა. მოვიკვლიეთ, შეგვეძლო თუ არა მისი გამოყენება; შესაძლებელი ყოფილა, ასე რომ, ორიგინალის ხმაბაძვით სიტყვები მოვიფიქრე და ის ხელმეორედ ჩავწერეთ. ამგვარად, მისამღერებში მანამდე არსებული შავი ხვრელები ამ მშვენიერმა ხმებმა შეავსო".

მშვენიერი ხმები კომპოზიციაში დირიჟორ რიჩარდ ჰიკოქსის მომღერლებმა გააჟღერეს. მასში ძნელად თუ გაარჩევ სიტყვებს, მაგრამ ინგლისელმა მუსიკოსებმა ქართულ მრავალხმიანობას სათანადო პატივი მიაგეს, წინწყარო კი, ბუშის დახმარებით, უამრავმა უცხოელმა მელომანმა გაიცნო.

თუმცა, კეიტ ბუშამდე ქართული პოლიფონიით და კონკრეტულად წინწყაროთი საკულტო გერმანელი კინორეჟისორი ვერნერ ჰერცოგი მოხიბლულა. სწორედ მისი გადაღებულია ფილმი ნოსფერატუ, რომელსაც ბუში ინტერვიუში ახსენებს.

ნოსფერატუ: ღამის მოჩვენება (Nosferatu: Phantom der Nacht) ეკრანებზე 1979 წელს გამოვიდა. ეს გოთიკური კინოსურათი ბრემ სტოკერის დრაკულას ერთგვარი ადაპტაციაა, სადაც გრაფი დრაკულა ტრანსილვანიიდან გერმანიის ქალაქ ვისმარში ინაცვლებს და ჭირს ავრცელებს. ჰერცოგის ნამუშევარს დიდი კომერციული წარმატება და კრიტიკოსების დადებითი გამოხმაურება მოჰყვა, დღეს კი ფილმი უკვე საშინელებათა ჟანრის კლასიკაა.

ნოსფერატუს ერთ-ერთ, დასკვნით სცენაში "დონს მაკაბრის", სიკვდილის ცეკვის შემაძრწუნებელი სურათი ცოცხლდება. ლუსი ჭირმოდებული ვისმარის მთავარ მოედანზე გადის და კუბოების გვერდით მოცეკვავე, მონადიმე ხალხს აკვირდება. სწორედ ამ სცენაში ისმის წინწყარო და ქართული სატრფიალო სიმღერა ავისმომასწავებელ მელოდიად იქცევა.

წინწყაროს ფილმში გამოყენებული ვერსია ანსამბლ გორდელას ეკუთვნის.

აღსანიშნავია, რომ წინწყარო ასევე ჟღერს უნგრელი რეჟისორის, დიორდ ფეჰერის, 1990 წელს გამოშვებულ დეტექტიურ ფილმში ბინდი (Szürkület), კეიტ ბუშის Hello Earth კი ამერიკული სერიალის, Miami Vice-ის, ერთ-ერთ ეპიზოდშია გამოყენებული. წინწყაროს "ქავერ" ვერსია ჩაწერილი აქვს ცნობილ ბოსნიელ მუსიკოსს, გორან ბრეგოვიჩსაც.