მგზავრთა ნაწილი უკმაყოფილოა თბილისში მოძრავი მიკროავტობუსებში არსებული სიბინძურით. მათი პრეტენზია, ძირითადად, ჭუჭყიან სავარძლებს ეხება. ისინი On.ge-სთან საუბარში ამბობენ, რომ თუ მიკროავტობუსში ადგილი თავისუფალია, ფეხზე დგომას თუნდაც ბინძურ სავარძელზე ჯდომას ამჯობინებენ, რადგან პიკის საათებში, ხშირად, მიკროავტობუსებში მგზავრების ფეხზე დასადგომი ადგილიც კი არ არის.

სტუდენტი გიორგი ფანცუალია ჩვენთან ინტერვიუში ამბობს, რომ მიკროავტობუსებში არსებული სისუფთავით კმაყოფილი არ არის: "სავარძლების სისუფთავე მისახედია, თან სასწრაფოდ. ბევრი ხალხი რომ ამოდის, ისიც მაწუხებს, რამდენი დასაჯდომიცაა, იმდენი ხალხი უნდა ავიდეს მიკროავტობუსში".

თამუნა ცინცაძე, მგზავრი: "სისუფთავის მხრივ ძალიან ცუდი მდგომარეობაა. თუმცა, ადგილი თუ არის ვჯდები და მეტი არაფერი მაწუხებს".

ანი პოპიაშვილი, მგზავრი: "უმეტეს შემთხვევაში სუფთაა, თუმცა ხანდახან, სავარძელზე ნაჭერი გახეულია, ან კევია დაკრული და ვერ ვჯდები ხოლმე. ჩემი აზრით, 3 თვეში ერთხელ მაინც უნდა იწმინდებოდეს სკამები".

ნინო ბილიხოძე, მგზავრი: "ისეთი დისკომფორტი არ მიგრძვნია, რომ ვერ დავჯდე. ჩემი აზრით, იმის კულტურაც არის, რომ მოქალაქეებმა არ დააბინძურონ. ვფიქრობ, დღის ბოლოს, ყოველთვის და აუცილებლად უნდა იწმინდებოდეს სავარძლები".

ფოტო: On.ge

ჩვენ ვესაუბრეთ რამდენიმე მიკროავტობუსის მძღოლს. მათ მიკროავტობუსებში ქიმწმენდისა და დასუფთავების შესახებ სხვადასხვა ინფორმაცია მოგვაწოდეს. 75 ნომერი მიკროავტობუსის მძღოლის თქმით, სავარძლებს ქიმწმენდას წელიწადში ორჯერ უტარებენ, ერთი პროცედურა კი 50 ლარი ღირს, რომელსაც თავად იხდიან და არა - თბილისის მიკროავტობუსის კომპანია.

განსხვავებული ინფორმაცია მოგვაწოდა 147 ნომერი მიკროავტობუსის ერთ-ერთმა მძღოლმა:

"ყოველ წელს ტარდება ქიმწმენდა, შეიძლება წელიწადში ორჯერაც ჩატარდეს, მაგრამ არამგონია. როგორც მახსოვს, 60 ლარი ჯდება. მძღოლების კისერზეა სულ ყველაფერი, ჩვენ ვიხდით ამის ფასს. მაგალითად, შარშან, ზაფხული რომ იწყებოდა, ყველას დაავალდებულეს მანქანების გაწმენდა და ჩვენთან ფარეხში გაწმინდეს, ვინც გაწმენდდა მიკროავტობუსს, მხოლოდ ის გამოვიდოდა სამუშაოდ ხაზზე".

აღნიშნული მძღოლის თქმით, ამის შემდეგ მათ სავარძლები არ გაუწმენდიათ: "სამი მზიანი დღე უნდა, რომ გაშრეს, თორემ მგზავრი ვერ დაჯდება. როგორც კი სიცხეები დაიწყება, ალბათ, ისევ დაავალდებულებენ გაწმენდას.

131 ნომერ სამარშრუტო ხაზზე მოძრავი ერთ-ერთი მიკროავტობუსის მძღოლის თქმით კი, ქიმწმენდას წელიწადში ერთხელ ატარებენ და ის 300 ლარამდე ჯდება.

როგორც კომპანია თბილისის მიკროავტობუსში On.ge-ს უთხრეს, მიკროავტობუსებს ქიმწმენდა წელიწადში ორჯერ უტარდებათ, ხოლო სალონი ყოველ საღამოს იწმინდება ავტოფარეხში შესვლის შემდეგ.