26 ივლისს პარიზში სტარტს ოლიმპიური თამაშები აიღებს, სადაც, რა თქმა უნდა, ჩვენი ქვეყანაც წარსდგება. ევროპის ჩემპიონატზე ჩვენი საოცარი ფეხბურთელების გულშემატკივრობის შემდეგ, დროა ოლიმპიადაზე გადმოვერთოთ და ჩვენებს სხვადასხვა სპორტის სახეობაში ვუგულშემატკივროთ, რათა მაქსიმალურად ბევრი მედალი მოვიპოვოთ და საქართველომ კიდევ ერთხელ გამოანათოს სპორტულ სამყაროში. ჩვენი ქვეყნის ოლიმპიური ნაკრების მთავარი მხარდამჭერი და სპონსორი საქართველოს ბანკია.

ქართველებისა და ოლიმპიური თამაშების ისტორია მეოცე საუკუნის 50-იანი წლებიდან იწყება, როდესაც საბჭოთა ხელისუფლებამ საერთაშორისო ოლიმპიურ მოძრაობაში მონაწილეობის გადაწყვეტილება მიიღო. საბჭოთა კავშირმა პირველად ოლიმპიადაზე 1952 წელს მიიღო მონაწილეობა, რა დროსაც მის გუნდში რამდენიმე ქართველი ირიცხებოდა. ჩვენებმა სადებიუტო ოლიმპიადაზევე შეძლეს მედლების მოპოვება. მაგალითად: დავით ციმაკურიძემ თავისუფალ ჭიდაობაში ოქროს მედალი მოიპოვა. უმაღლესი სინჯი აიღო რაფაელ ჩიმიშკიანმა ძალოსნობაში. მედეა ჯუღელმა ტანვარჯიშში ოქროსა და ვერცხლის მედლები მოიპოვა. კალათბურთელებმა ოთარ ქორქიამ და ნოდარ ჯორჯიკიამ კი ვერცხლი დაისაკუთრეს. ლევან სანაძემ მძლეოსნობაში ასევე ვერცხლი, ხოლო ნადეჟდა ხნიკინამ და ნინო დუმბაძემ ამავე სახეობაში ბრინჯაოს მედლები მოიპოვეს. ასე, რომ ქართველები საბჭოთა კავშირის შემადგენლობაში სტარტიდან მოყოლებული წარმატებით ასპარეზობენ. მნიშვნელოვანი ფაქტია, რომ საბჭოთა კავშირის შემადგენლობაში ასპარეზობიდან დღემდე ქართველებს ჯამში 133 მედალი აქვთ მოპოვებული, საიდანაც 41 ოქროა.

ჩვენმა ქვეყანამ დამოუკიდებელი ნაბიჯების გადადგმა 1989 წლიდან დაიწყო, როცა ეროვნული ოლიმპიური კომიტეტი შეიქმნა. საქართველო საერთაშორისო კომიტეტში 1993 წელს გაწევრიანდა. 1992 წელს საქართველომ საბჭოთა კავშირიდან გამოყოფის შემდეგ პირველ ოლიმპიადაზე იასპარეზა. ჩვენი ქვეყანა 11 ყოფილ საბჭოთა რესპუბლიკასთან ერთად გაერთიანდა და ისე გამოდიოდა, თუმცა ქართველ გამომსვლელებთან ყოველთვის იყო აღნიშნული მათი ეროვნება. ამ ტურნირზე ჯამში 12-მა ქართველმა იასპარეზა, რომელთაგანაც რვამ მედალი მოიპოვა, ჯამში 3 ოქრო და 5 ბრინჯაო. დამოუკიდებელი ქვეყნის სტატუსით საქართველომ პირველად 1994 წლის ზამთრის ოლიმპიურ თამაშებზე იასპარეზა. აქედან მოყოლებული ქართველ ათლეტებს ჯამში 40 მედალი აქვთ მოგებული (თუ ათვლის წერტილად 1992 წელს ავიღებთ, ჯამში 48 მედალი) ძირითადად ჭიდაობაში, ძიუდოსა და ძალოსნობაში. Საინტერესოა, რომ ყველა მედალი ჩვენებმა ზაფხულის ოლიმპიურ თამაშებზე მოიპოვეს.

პირველი მედლები, როგორც დამოუკიდებელმა ქვეყანამ, 1996 წლის ზაფხულის ოლიმპიურ თამაშებზე მოივპოვეთ. სოსო ლიპარტელიანმა ძიუდოში, ხოლო ელდარ კურტანიძემ ჭიდაობაში ბრინჯაოს მედლები მოიგეს. აღსანიშნავია, რომ საქართველოსთვის პირველი ოქროს მედალი ძიუდოისტმა ზურაბ ზვიადაურმა 2004 წელს მოიპოვა. იმავე წელს მეორე ოქრო, ძალოსნობაში, გიორგი ასანიძემ იგდო ხელთ.

ამის შემდეგ იყო 2008 წელი, წელი, რომელიც ჩვენი ქვეყნისთვის ძალიან მძიმეა. საქართველოში ომის პარალელურად, 8 აგვისტოს ჩინეთში ოლიმპიური თამაშები დაიწყო, სადაც ჩვენი ქვეყანაც წარსდგა. ჩვენთვის ამ ძალიან რთულ პერიოდში ქართველმა სპორტსმენებმა მაინც შეძლეს გულშემატკივრის გახარება და სიხარულის მოტანა. ძიუდოისტმა ირაკლი ცირეკიძემ და მოჭიდავეებმა მანუჩარ კვირკველიამ და რევაზ მინდორაშვილმა ოქროს მედლები მოიგეს. ეს იყო პერიოდი, როდესაც ჩვენთან არსებული მძიმე რეალობა სპორტმა დროებით გაგვილამაზა.

მომდევნო, 2012 წლის ოლიმპიურ თამაშებზე კი გამოჩნდა გამორჩეული ქართველი ძიუდოისტი, ლაშა შავდათუაშვილი. ამ წელს საქართველომ ერთადერთი ოქრო მოიგო, რომელიც ლაშას ანგარიშზეა. აღსანიშნავია ისიც, რომ ლაშა ამ ოლიმპიადის ყველაზე ახალგაზრდა გამომსვლელი იყო, ამასთანავე ის დამოუკიდებელი საქართველოს ისტორიაში ყველაზე ახალგაზრდა ოლიმპიური ჩემპიონიც გახდა. ლაშა შავდათუაშვილმა მომდევნო ორ ოლიმპიადაზეც მოახერხა მედლების მოპოვება და ისტორიაც დაწერა. 2016 წელს მან ბრინჯაო, ხოლო 2020 წელს ვერცხლი დაისაკუთრა.

თითქმის ყოველ ოლიმპიადას თან ახლავს გამორჩეული ქართველი სპორტსმენების გამოჩენა, შესაბამისად, არც 2016 წლის რიოს ოლიმპიური თამაშები აღმოჩნდა გამონაკლისი. ამ ოლიმპიადაზე ქართული სპორტის ცოცხალმა ლეგენდამ, ძალოსანმა — ლაშა ტალახაძემ პირველი ოლიმპიური ოქრო მოიგო. ტალახაძემ მომდევნო ოლიმპიადაზეც დაისაკუთრა ოქროს მედალი და სახეობაში უკონკურეტნო ათლეტადაც იქცა. გვჯერა, რომ ლაშა წელსაც იგივეს გაიმეორებს და ზედიზედ მესამე ოლიმპიადას მოიგებს.

ჩვენთვის ძალიან გამორჩეული აღმოჩნდა 2020 წლის ტოკიოს ოლიმპიური თამაშები, ვინაიდან ჩვენებმა რეკორდული 8 მედალი მოიპოვეს. მათ შორის, ძიუდოში, ახალგაზრდა ლაშა ბექაურმა, ხოლო ზედიზედ მეორე ოლიმპიადაზე, ლეგენდარულმა ქართველმა ძალოსანმა, ლაშა ტალახაძემ, ოქროს მედლები მოიგეს. ამ ოლიმპიადაზე ლაშა შავდათუაშვილმაც დაუვიწყარი ისტორია დაწერა. მან ზედიზედ მესამე ოლიმპიადაზე შეძლო მედლის მოპოვება. ლაშამ ამ ოლიმპიადაზე ვერცხლის მედალი მოიპოვა.

ცალკე უნდა გამოვარჩიოთ ქართული სპორტის ცოცხალი ლეგენდა - ნინო სალუქვაძე. სალუქვაძემ პირველად სსრკ-ს სახელით, 1988 წლის ოლიმპიადაზე, 19 წლის ასაკში, იასპარეზა და მიზანში სროლაში ოქროს მედალიც მოიპოვა. ნინომ ჯამში 9 ოლიმპიურ თამაშებზე მიიღო მონაწილეობა, რაც ქალებში აბსოლუტური რეკორდია. ის გაჩერებას არ აპირებს და ამ ზაფხულს მეათედ იასპარეზებს ოლიმპიადაზე და ამ მაჩვენებლით კანადელ იან მილართან ერთად, როგორც ქალებს, ისე კაცებს შორის თანარეკორდსმენი გახდება.

ქართველი სპორტსმენები არც ამ ოლიმპიადაზე აპირებენ გაჩერებას და გულშემატკივრების გასახარად არაერთი მედლის მოპოვებას შეეცდებიან. ჩვენ კი ისღა დაგვრჩენია უბრალოდ მათ ვუგულშემატკივროთ.