საქართველოს ბანკი, კორპორატიული სოციალური პასუხისმგებლობის ფარგლებში, მრავალი წელია ხელს უწყობს ქვეყნის ენდემური სახეობების დაცვასა და კონსერვაციას. სწორედ ამ მიზნით, უკვე 13 დაცული ტერიტორიის მხარდამჭერია.

საქართველოს ბუნების შენარჩუნების მიზნით კი, ფინანსური ინსტიტუტი კავკასიის ბუნების ფონდთან (CNF) ერთად, ახალ კამპანიას ახორციელებს, რომლის ინსპირაციის წყაროც საქართველოს ბანკის ლოგო გახდა.

კამპანიის ფარგლებში, ორგანიზაციები დიდ ბრენდებს, რომლებიც საკუთარ ლოგოებში ცხოველისა თუ ფრინველის სიმბოლოს იყენებენ, მოუწოდებენ საზოგადოებას, მხარი დაუჭირონ გადაშენების პირას მყოფი ფაუნის სახეობების შენარჩუნებას.

”კორპორატიული სოციალური პასუხიმგებლობის ფარგლებში, საქართველოს ბანკი უკვე მრავალი წელია კავკასიის ბუნების ფონდთან თანამშრომლობს. CNF ეხმარება ყველა დაცულ ტერიტორიასა და ნაციონალურ პარკს უნიკალური სახეობების შენარჩუნებაში. აერთიანებს ცხოველებისა და ფრინველების იმ სახეობებს, რომლებსაც გადარჩენა და კონსერვაცია სჭირდებათ. როდესაც გავაცნობიერეთ, რომ თავად ჩვენ, საქართველოს ბანკი, უკვე 24 წელია, ლოგოდ ლომის გამოსახულებას ვიყენებთ, გადავწყვიტეთ, სხვა ბრენდებისთვისაც მიგვეწვდინა ხმა, გავერთიანებულიყავით ერთი მისიით და ეს ერთგვარი ვალი ბუნებისთვის დაგვებრუნებინა”, — ვკითხულობთ საქართველოს ბანკის განცხადებაში.

საქართველოს ბანკისა და კავკასიის ბუნების ფონდის (CNF) კამპანიაში უკვე ჩაერთო ხუთი კომპანია:

  • Georgian Capital;
  • ასკანელი;
  • სარაჯიშვილი;
  • ივანე ჯავახიშვილის სახელობის თბილისის სახელმწიფო უნივერსიტეტი (თსუ);
  • სმარტი;

კამპანიის ფარგლებში საქართველოს ბანკი და კავკასიის ბუნების ფონდი (CNF) კომპანიებს მოუწოდებენ, შეუერთდნენ ინიციატივას და საკუთარი წვლილი შეიტანონ ბუნების დაცვის საქმეში.

ინფორმაციისთვის, აღნიშნული კამპანია კრეატიულ სააგენტო Leavingstone-თან თანამშრომლობით ხორციელდება.