Airbnb-მ Inside Out 2-ით შთაგონებული სახლი შექმნა

Inside Out-ის მოყვარულებს Airbnb-მ განსაკუთრებული სიურპრიზი მოუმზადა — ახლა უკვე შესაძლებელია ანიმაციური ფილმით შთაგონებულ სახლში ბედნიერი მოგონებების შექმნა!

Inside Out 2-ის დიდ ეკრანებზე გამოჩენის აღსანიშნავად Airbnb-მ რაილის გონებაში არსებული ემოციათა შტაბი რეალობად აქცია და სახლი პიქსარის ანიმაციას მაქსიმალურად დაამსგავსა.

ლას-ვეგასში მდებარე ფერადი, ფუტურისტული სივრცის მასპინძელია ფილმის პერსონაჟი სიხარული — ჯოი, რომელსაც მსახიობი ემი პოლერი ახმოვანებს.

Airbnb მომხმარებლებს ხშირად სთავაზობს სხვადასხვა თემატიკის მქონე სახლებსა თუ ბინებში დროის სასიამოვნო გატარების შესაძლებლობას. მაგალითად, წინა ზაფხულს მალიბუში ბარბის ვარდისფერი სახლი გამოჩნდა, რომელიც ფილმ ბარბის თავბრუდამხვევ პოპულარობას უკავშირდებოდა.

Inside Out მოზარდი გოგოს, სახელად რაილის, ცხოვრების შესახებ გვიყვება, რომელიც ანიმაციის მეორე ნაწილში უკვე 13 წლისაა. Inside Out გამორჩეული და ორიგინალური იმითაა, რომ ანიმაციის ძირითადი სიუჟეტი რაილის ტვინში ვითარდება, სადაც არაერთ ემოციას, როგორც პერსონაჟს, ისე ვეცნობით.

ცოტა ხნის წინ Inside Out 2-ის კიდევ ერთი ტრეილერი გამოვიდა და ცნობილი გახდა, რომ ანიმაციის მე-2 სეზონში 4 ახალ პერსონაჟს ვიხილავთ. შფოთვა, უხერხულობა, მოწყენილობა და შური ის ახალი ემოციებია, რომლებიც რაილის ცხოვრებაში ახლახან გამოჩნდნენ.