თუ დიდი ხანია, Shrek-ის ფანი ხარ და გსურს, ღამე ამ პერსონაჟის ჭაობის სახლში გაატარო, მალე ამის შანსი გექნება. Airbnb-ზე მალე შრეკის ჭაობის სახლი გაქირავდება, დაჯავშნა შემდეგ თვიდან იქნება შესაძლებელი, თუმცა ამისთვის სისწრაფე და ცოტა იღბალიც დაგჭირდება.

ფოტო: Airbnb

შრეკის ჭაობის სახლის დაჯავშნა 13 ოქტომბრის შუადღის პირველი საათიდან იქნება შესაძლებელი. ფილმის ფანებს შოტლანდიის მაღალმთიან რაიონში, პერსონაჟის სახლში, სურვილისამებრ 1 ან 2 ღამის გატარება შეეძლებათ. ამ ეტაპზე სახლის დაჯავშნის თარიღი მხოლოდ 27-29 ოქტომბერია. Airbnb-ის განცხადებით, ამ პერიოდში შრეკის ჭაობის სახლის დაჯავშნა 0 დოლარი ეღირება. ასევე Airbnb გეგმავს, რომ HopScotch-ის ბავშვთა საქველმოქმედო ფონდს ერთჯერადი დახმარება გაუწიოს.

Airbnb ასევე აღნიშნავს, რომ ეს "შეჯიბრი" სულაც არ არის და მათ, ვინც შრეკის ჭაობის სახლს დაჯავშნის, მოგზაურობის საფასურის გადახდა თავად მოუწევს. თუმცა შრეკის ნამდვილს ფანებს ეს ვერ შეაჩერებს, რადგან პერსონაჟის ჭაობის სახლში თითოეული ავეჯი და ინვენტარი ზუსტად ისეა დალაგებული, როგორც ფილმში.

ფოტო: Airbnb

ვინც იღბლიანი აღმოჩნდება და შრეკის სახლს იქირავებს, შეუძლია, პერსონაჟის ლოგინზე წამოწვეს, ცვილის სანთელი აანთოს ან სახლის გარეთ ბუნებაში გაისეირნოს. რაც მთავარია, დამსვენებლებს მასპინძლობას შრეკის მეგობარი ვირი გაუწევთ და თან სახლში ძალიან ბევრი ვაფლიც დახვდებათ.