მოკლედ: არასამთავრობო ორგანიზაცია, ფეა თრიიზ ფონდი აცხადებს, რომ რუსული კანონის მიღების გამო, ონში ბავშვთა სტომატოლოგიური კლინიკის გახსნის პროექტს აჩერებენ, რომელიც არასრულწლოვანებს უფასოდ უნდა მომსახურებოდა.

  • "პროექტზე მუშაობის დაწყება შესაძლებელი გახდა 2023 წელს, ონის მოსახლეობის დიდი თხოვნის და აქტიური ჩართულობის შედეგად", — წერს ორგანიზაცია.

დეტალები: განცხადების მიხედვით, რუსული კანონი სერიოზულ გამოწვევას უქმნის ორგანიზაციას, რადგან აიძულებს საჯარო რეესტრში დარეგისტრირდნენ როგორც "უცხოური ინტერესების მატარებელი":

  • "ჩვენი ორგანიზაცია დაარსების დღიდან ახორციელებს სოციალურ და საგანმანათლებლო პროექტებს, რომლებიც მიმართულია რაჭის მოსახლეობის საუკეთესო ინტერესებისკენ. შესაბამისად, ჩვენ არ მიგვაჩნია, რომ ჩვენი ორგანიზაცია უნდა იყოს უცხოური ინტერესების მატარებელი რეესტრში".
  • ფონდი ფეა თრიიზ წერს, რომ მოსალოდნელია მათ დაეკისროთ ჯარიმები და შეექმნათ ფინანსური პრობლემები, ამის გამო კი, "სახელმწიფო სტრუქტურებთან თანამშრომლობის სივრცე აღარ რჩებათ".

გაიგე მეტი: "ჩვენ ვაცხადებთ დაუმორჩილებლობას — არა რუსულ კანონს! კი ევროპას!" — არასამთავრობო ორგანიზაციების განცხადება

განცხადების მიხედვით, ორგანიზაციამ მრავალჯერ, უშედეგოდ სცადა რაჭა-ლეჩხუმისა და ქვემო სვანეთის მაჟორიტარ დეპუტატთან, გოჩა ენუქიძესთან შეხვედრა, რათა რაჭის მოსახლეობაზე, რუსული კანონის მოსალოდნელი უარყოფითი გავლენა განეხილათ.

კონტექსტი: 28 მაისს, საპარლამენტო უმრავლესობამ, პრეზიდენტ სალომე ზურაბიშვილის ვეტო რუსულ კანონზე, დაძლია.

  • კანონის თავდაპირველ ვერსიას მხარი დაუჭირა 84-მა დეპუტატმა, 4-ის წინააღმდეგ.

ამ თემაზე: ვინ დაუჭირა და ვინ არა მხარი რუსულ კანონს — დეპუტატების სია