მოკლედ: სასამართლომ 2008 წლის აგვისტოს ომის მონაწილის როინ შავაძის განზრახ უკანონო დაკავებისა და უმწეო მდგომარეობაში მყოფის ჯგუფური მკვლელობის, ასევე სამსახურებრივი უფლებამოსილების ძალადობით გადამეტების ფაქტზე, კონსტიტუციური უსაფრთხოების დეპარტამენტის (კუდი) აჭარის მთავარი სამმართველოს უფროსი და ოთხი სპეცრაზმელი დამნაშავედ ცნო.

დეტალები: პროკურატურის ინფორმაციით, გამოძიებამ დაადგინა, რომ

  • 2008 წლის 16 აგვისტოს, კუდის აჭარის მთავარი სამმართველოს თანამშრომლები, ამავე სამმართველოს უფროსისა და მისი მოადგილის ხელმძღვანელობით, თავს დაესხნენ კაფეში მყოფ როინ შავაძეს და ავტომატების კონდახების გამოყენებით, სასტიკად გაუსწორდნენ.
  • მიზეზი, თითქოსდა, ოპერატიული ინფორმაცია იყო, რომ ის უცხო ქვეყნის სპეცსამსახურებთან თანამშრომლობდა.
  • როინ შავაძემ ძალადობის შედეგად სიცოცხლისთვის სახიფათო, სხეულის მძიმე ხარისხის დაზიანებები მიიღო.
  • ამის შემდეგ, სპეცდანიშნულების რაზმის წევრებმა გონებადაკარგული შავაძე მანქანით წაიყვანეს და აჭარა-გურიის საზღვართან ავტომატური ცეცხლსასროლი იარაღებიდან მრავალჯერადი გასროლებით მოკლეს.

თბილისის საქალაქო სასამართლომ ხუთივე ბრალდებული სრულად ცნო დამნაშავედ წარდგენილ ბრალდებებში და სასჯელის სახედ და ზომად 16-16 წლით თავისუფლების აღკვეთა განუსაზღვრა.

  • თუმცა, დანიშნული სასჯელი ამნისტიის შესახებ კანონით შემცირდა და საბოლოოდ, ბრალდებულებს 12 -12 წლით თავისუფლების აღკვეთა მიესაჯათ.

ბოლო ხაზი: ამ საქმეზე სისხლისსამართლებრივი დევნა ჯამში 12 პირის მიმართ დაიწყო.

  • აქედან, კუდის აჭარის მთავარი სამმართველოს უფროსის მოადგილის და ერთი სპეცრაზმელის საქმე, უკვე განიხილა ნაფიც მსაჯულთა სასამართლომ და ორივე ბრალდებული სრულად ცნო დამნაშავედ წარდგენილ ბრალდებებში.
  • მოცემულ ეტაპზე სისხლის სამართლის საქმეზე გამოძიება გრძელდება, დანაშაულში მონაწილე სხვა პირთა გამოვლენის და მხილების მიზნით.