მოკლედ: საერთაშორისო გამჭვირვალობა — საქართველო (TI) წერს, რომ თბილისის სააპელაციო სასამართლოს თავმჯდომარე, აშშ-ს მიერ სანქცირებული, მიხეილ ჩინჩალაძე მოსამართლის ფუნქციას არ ასრულებს.

მისი 16-წლიანი კარიერიდან, 4-წლიანმა მონაკვეთმა (2010-2013) ისე გაიარა, რომ მას არცერთი საქმე არ განუხილავს, მაგრამ 448 020 ლარის ანაზღაურება აიღო.

  • "ეს იმ ფონზე, როცა სასამართლო სისტემაში მოსამართლეთა გადატვირთულობა და მათ შორის ამ მიზეზით, საქმეთა გაჭიანურება მნიშვნელოვანი გამოწვევაა", — წერს TI.

დეტალები: TI-ის მიხედვით, დანარჩენ წლებშიც მიხეილ ჩინჩალაძე თვეში, საშუალოდ, მხოლოდ 2 საქმეს განიხილავდა, მაშინ, როდესაც სხვა მოსამართლეებს, წლის განმავლობაში, ასობით საქმის განხილვა უხდებათ:

  • TI მაგალითისთვის წერს, რომ 2022 წელს თბილისის სააპელაციო სასამართლოს მოსამართლის მიერ განხილული საქმეების საშუალო მაჩვენებელი 273 იყო.

აღსანიშნავია, რომ აშშ-ის მიერ სანქცირებული კიდევ ერთი მოსამართლის, ლევან მურუსიძის განხილულ სულ ცოტა ხუთ საქმეზე, ადამიანის ფუნდამენტური უფლებების დარღვევა დადგინდა.

  • განხილული საქმეებიდან სამზე, სასამართლომ დარღვევების შესახებ გადაწყვეტილება გამოიტანა, ხოლო ორ საქმეზე, სახელმწიფომ თავად აღიარა დარღვევა.
  • ამ საქმეების გამო, საქართველოს დაზარალებულების სასარგებლოდ, ჯამში, 105 988 ევროს გადახდა მოუწია.

ბოლო ხაზი: 2023 წლის 5 აპრილს, აშშ-მა სანქციები დაუწესა სამ მოქმედ და ერთ ყოფილ მოსამართლეს.

  • ევროკომისიის რეკომენდაციის თანახმად, მიხეილ ჩინჩალაძე კეთილსინდისიერების შემოწმებას უნდა დაექვემდებაროს, რასაც სასამართლო კლანი და ხელისუფლება აქტიურად ეწინააღმდეგება.
  • ეს შემოწმება აუცილებელი წინაპირობაა, რათა საქართველომ შეძლოს ევროკავშირში გაწევრიანებაზე მოლაპარაკებების დაწყება.

გაიგე მეტი: რა წერია ევროკომისიის 9 დათქმაში მართლმსაჯულების შესახებ