სპორტული სამოსის მწარმოებელმა გერმანულმა კომპანია Adidas-მა ქვეყნის ეროვნული საფეხბურთო ნაკრების 44-ნომრიანი მაისურები გაყიდვიდან ამოიღო. მიზეზი მაისურზე გამოსახული რიცხვის მსგავსებაა ნაცისტური ორგანიზაცია შუცშტაფელის (SS) ლოგოსთან, რომელიც გერმანიაში აკრძალული სიმბოლოა.

შუცშტაფელი ნაცისტური რეჟიმის დროს მოქმედი პარამილიტარისტული ორგანიზაცია იყო, რომელიც ადოლფ ჰიტლერს ძალაუფლების ხელში ჩაგდებაში დაეხმარა. შუცშტაფელია მთავარი დამნაშავე ჰოლოკოსტშიც, რომელმაც ექვს მილიონამდე ებრაელი ადამიანი იმსხვერპლა. კაცობრიობის წინაშე ჩადენილი დანაშაულებისთვის, ორგანიზაციის წევრები ნაცისტურ პარტიასთან ერთად გასამართლდნენ საერთაშორისო ტრიბუნალზე. შუცშტაფელის ლოგო, რომელზეც ძველგერმანული რუნებია გამოსახული, გერმანიაში დღეს კანონით აკრძალული სიმბოლოა.

ერთ-ერთი პირველი, ვინც ადიდასის მაისურის ახალი დიზაინის პრობლემურობას გაუსვა ხაზი, გერმანელი ისტორიკოსი მიხაელ კენიგი იყო. ხოლო მას შემდეგ, რაც თავდაპირველი ვიზუალის გამოქვეყნებას სოციალურ ქსელშიც არაერთგვაროვანი გამოხმაურება მოჰყვა, ადიდასმა პროდუქტის გაყიდვა შეწყვიტა, ანტისემიტიზმი დაგმო და 4-ნომრის დიზაინის ცვლილებაც დააანონსა.

"ჩვენს ონლაინმაღაზიაში მაისურის პერსონალიზებას შევზღუდავთ", — აღნიშნავს ადიდასის წარმომადგენელი ოლივერ ბრიუგენი, — "როგორც კომპანია, ჩვენ აქტიურად ვუპირისპირდებით ქსენოფობიას, ანტისემიტიზმს, ძალადობას და სიძულვილის ნებისმიერ ფორმას".

ამ დროისთვის, ადიდასის საიტზე მაისურის პერსონალიზება სასურველი სახელითა და ნომრით შეუძლებელია. თავის ონლაინმაღაზიაში 44-ნომრიანი მაისურები გაყიდვიდან ამოიღო გერმანიის ფეხბურთის ფედერაციამაც.

ადიდასი კი სწორედ ფეხბურთის ფედერაციას და მის პარტნიორ 11Teamsport-ს ადანაშაულებს დაშვებულ შეცდომაში. საპასუხოდ, ფედერაციის წარმომადგენელი ფრანცისკა ვიულე ამბობს, რომ მაისურზე გამოსახული სახელისა და ნომრისთვის ფონტი 11Teamsport-მა შექმნა მათთან თანამშრომლობით, ჩართულმა მხარეებმა კი იმ დროისთვის ნაცისტურ სიმბოლოსთან მსგავსება ვერ დაინახეს. ვიულეს თქმით, ამჟამად მუშავდება ფონტის ახალი დიზაინი, რომელიც მოგვიანებით UEFA-მაც უნდა დაამტკიცოს.