რა ხდება: პარტია ქართული ოცნების აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ, გასულ, 1-ელი აპრილის საღამოს სპეციალური ბრიფინგი გამართა და საქართველოში აშშ-ის ელჩს, რობინ დანიგანს საჯაროდ მიმართა, რომ სანქციები, რომელიც მოსამართლეებს აშშ-სგან დაუწესდათ, მოეხსნათ.

  • მამუკა მდინარაძემ განაცხადა, რომ ამ საკითხში ქართული ოცნება "კატეგორიულია" და აღნიშნა, რომ ქართულ მხარეს ჯერ არ მიუღია მტკიცებულება, რომელიც მიუთითებს მოსამართლეების მიმართ სანქციების გამოყენების მიზანშეწონილობაზე.
  • და განავითარა მოსაზრება, რომ თითქოს, საქართველოში მოსამართლეთა სანქცირება ის საკითხია, რაც ანტიამერიკულ განწყობებს იწვევს: "თუ რაიმე შეიძლება ანტიამერიკულ, ანტიდასავლურ განწყობებს აღვივებდეს, ეს არის უსაფუძვლო გადაწყვეტილებები, როგორიცაა მოსამართლეთა დასანქცირება. ამიტომ, ჩვენ კატეგორიულები ვართ ამ თხოვნაში თუ მოთხოვნაში, რომ მათ მოეხსნათ სანქციები და არ მისცეს ჩვენმა მეგობარმა რომელიმე მდაბიო და ბოროტ სუბიექტს ამ ფაქტით მანიპულირების უფლება", — თქვა მან.

კონტექსტი: ერთი წლის წინ, 2023 წლის აპრილში აშშ-ის სახელმწიფო დეპარტამენტმა ლევან მურუსიძე, მიხეილ ჩინჩალაძე და კიდევ ორი ქართველი მოსამართლე დაასანქცირა.

  • სანქციები დაუწესდათ მათ ოჯახის წევრებსაც და აშშ-ში შესვლა აეკრძალათ.
  • სახდეპის იმდროინდელი განცხადების თანახმად, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, "რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ."

რა უნდა გვახსოვდეს ამ მოსამართლეებზე: ლევან მურუსიძე ე.წ. სასამართლო კლანის გავლენიან წევრად მოიაზრება. ის იყო სანდრო გირგვლიანის საქმის მოსამართლე ხელისუფლებაში მიხეილ სააკაშვილის "ნაციონალური მოძრაობის" ყოფნისას. ლევან მურუსიძე 2022 წლის 23 ოქტომბერს იუსტიციის უმაღლეს საბჭოს წევრად ხელახლა აირჩიეს, გადაწყვეტილება კი არასამთავრობო ორგანიზაციებმა და პოლიტიკურმა პარტიებმა გააკრიტიკეს. [მეტი]

  • რაც შეეხება მიხეილ ჩინჩალაძეს, ის 2022 წლის 27 ივნისს 5 წლის ვადით სააპელაციო სასამართლოს თავმჯდომარედ ისევ აირჩიეს, ჩინჩალაძე ამ პოზიციაზე წარდგენილი ერთადერთი კანდიდატი იყო. [მეტი]
    არასამთავრობო სექტორმა, საერთაშორისო პარტნიორებმა და ოპოზიციამ არაერთხელ აღნიშნა, რომ მოსამართლეთა ნაწილი გადაწყვეტილებებს მმართველი გუნდის პოლიტიკური დაკვეთით იღებს.

მდინარაძე სამოქალაქო სექტორის წინააღმდეგ: საპარლამენტო უმრავლესობის ლიდერმა, იმავე განცხადებაში, კიდევ ერთხელ სცადა სამოქალაქო სექტორის დისკრედიტაცია და "მდაბიო კამპანია" უწოდა არასამთავრობო სექტორის კრიტიკულ მოსაზრებებს საქართველოში მართლმსაჯულების სისტემასთან დაკავშირებით.

საგულისხმოა, რომ ბოლო პერიოდში ხმამაღლა ისმის არასამთავრობო ორგანიზაციების მოთხოვნა, გადამოწმდეს რამდენიმე ათეული მოსამართლის კეთილსინდისიერება, ევროკავშირის მოთხოვნების თანახმად.

ევროკავშირის პირობების თანახმად, მართლმსაჯულების სისტემური გამოწვევების გადასაჭრელად საჭიროა კეთილსინდისიერების შემოწმება უფრო საფუძვლიანად და სისტემატურად, რეგიონში დამკვიდრებული საუკეთესო პრაქტიკის შესაბამისად, ევროკომისიასა და ვენეციის კომისიასთან კონსულტაციების საფუძველზე.

ფართო სურათში: საქართველოში მოსამართლეთა კეთილსინდისიერების შემოწმების წინააღმდეგ არიან მიმართული მხოლოდ მმართველი პარტია ქართული ოცნება და სასამართლო სისტემის გავლენიანი პირები.

  • მათ რიგშია საქართველოს უზენაესი სასამართლოც, რომელმაც 11 მარტს გავრცელებულ განცხადებაში "შეშფოთება" გამოთქვა და განაცხადა, რომ კეთილსინდისიერების შემოწმება სასამართლოსა და მოსამართლეების დამოუკიდებლობას ლახავს; 24 მარტს კი, ამ განცხადებას მხარი დაუჭირა 295-მა მოსამართლემ, იუსტიციის უმაღლეს სკოლაში გამართულ საქართველოს მოსამართლეთა XXXII კონფერენციაზე.

რედაქციისგან: დაასრულებს თუ არა კეთილსინდისიერების შემოწმება სასამართლო კლანს