მოკლედ: ირაკლი ღარიბაშვილი აცხადებს, რომ საქართველოს პრეზიდენტის, სალომე ზურაბიშვილის მიუნხენში ვიზიტი არის "ღალატი" და ეს ქცევა "სირცხვილია პარტიის დამფუძნებლის, ბიძინა ივანიშვილის მიერ მოყვანილი პრეზიდენტისგან".

• ამის შესახებ ქართული ოცნების თავმჯდომარემ პრესკონფერენციაზე განაცხადა.

დეტალები: ღარიბაშვილის შეფასებით, ზურაბიშვილმა არაერთხელ დაარღვია კონსტიტუცია და ახლაც აგრძელებს.

• მისი თქმით, ზურაბიშვილის რეიტინგი 1% იყო და "ქართულმა ოცნებამ და ბიძინა ივანიშვილმა იგი მოიყვანა პრეზიდენტად".
• ღარიბაშვილი ამბობს, რომ პრეზიდენტს ევროკავშირის კანდიდატის სტატუსის მისაღებად არაფერი გაუკეთებია: "მისი მიზანი იყო, რამენაირად წაეღო ის დიდი მონაპოვარი — სტატუსი, რომელიც ჩვენ მოვიტანეთ ხალხისთვის, ხალხთან ერთად. მაგრამ აქაც განიცადა ფიასკო".
• ასევე განაცხადა, რომ ზურაბიშვილის "ხვედრი იქნება შესაბამისი", რადგან ოპოზიციასთან ერთად იზეიმებს წაგებას.

კონტექსტი: პრეზიდენტის ადმინისტრაციამ 13 თებერვალს მედიასთან დაადასტურა, რომ ზურაბიშვილი მიუნხენის უსაფრთხოების კონფერენციაზე მიიწვიეს და შესაბამისად, მონაწილეობას მიიღებდა. პრეზიდენტს მიუნხენის კონფერენციაში მონაწილეობის მისაღებად მთავრობისთვის თანხმობის მისაღებად არ მიუმართავს.

• მიუნხენის უსაფრთხოების კონფერენცია 17-18 თებერვალს ჩატარდება.
• არსებული ინფორმაციით, კონფერენციაში მონაწილეობას არ მიიღებს პრემიერ-მინისტრი ირაკლი კობახიძე, საქართველოს მთავრობიდან კონფერენციას საგარეო საქმეთა მინისტრი, ილია დარჩიაშვილი დაესწრება.

წინაისტორია: 2023 წლის 30 აგვისტოს ცნობილი გახდა, რომ სალომე ზურაბიშვილი საქართველოსთვის კანდიდატის სტატუსის მინიჭების მხარდასაჭერად ევროპულ ლიდერებთან შეხვედრებს იწყებდა, რასაც ქართული ოცნების მიერ ზურაბიშვილის ერთხმად გაკრიტიკება მოჰყვა — ირაკლი კობახიძემ და სხვებმა ის კონსტიტუციის უხეშ დარღვევაში დაადანაშაულეს და დააანონსეს, რომ ამას "რეაგირების გარეშე ვერ დატოვებდნენ". მთავრობის უარის მიუხედავად, ზურაბიშვილის ვიზიტები მაინც შედგა.

• მმართველი პარტია აპელირებდა იმაზე, რომ რომ მთავრობის თანხმობის გარეშე ოფიციალური ვიზიტები არაკონსტიტუციურია, ამიტომ მიიღეს გადაწყვეტილება, პრეზიდენტის მიმართ იმპიჩმენტის პროცედურა დაეწყოთ.
• საკონსტიტუციო სასამართლომ პარლამენტის წევრების [ირაკლი კობახიძის, შალვა პაპუაშვილის, მამუკა მდინარაძის და სხვების, სულ 80 წევრის] კონსტიტუციური წარდგინება პრეზიდენტის იმპიჩმენტთან დაკავშირებით 22 სექტემბერს მიიღო.
• საკონსტიტუციო სასამართლომ ზურაბიშვილი კონსტიტუციის დამრღვევად ცნო, თუმცა საპარლამენტო უმრავლესობამ, არასაკმარისი ხმების გამო, პრეზიდენტის იმპიჩმენტი ვერ შეძლო.