"დაბადების დღეზე რომ მიხვიდე და აგინო ადამიანს, ეს ღირებულება კი არა, კულტურაში საერთოდ ეწერება რამეში?", — ოცნების პარლამენტის თავმჯდომარე, შალვა პაპუაშვილი 26 მაისს "ვაიმარის სამკუთხედის" მიერ გავრცელებულ განცხადებას გამოეხმაურა. სადაც სამი ევროპული ქვეყნის ლიდერი გმობს "საქართველოს ხელისუფლების ყველა ქმედებას, რომელიც იწვევს დემოკრატიულ უკუსვლას, და სამოქალაქო საზოგადოებაზე, მედიაზე და მთავრობის მიმართ კრიტიკულად განწყობილ ადამიანებზე თავდასხმებს".

"დაბადების დღეზე რომ მიხვიდე და აგინო ადამიანს, ეს ღირებულება კი არა, კულტურაში საერთოდ ეწერება რამეში? ამიტომ, ეს თუ ევროპული ღირებულებაა, მათი გაგებით, მათეული ევროკავშირული ღირებულებაა, მაშინ ისინი საუკუნეებით უკან ყოფილან ქართულ ღირებულებებზე. წარმოუდგენელია საერთოდ, რომ ასეთი რაღაცა იკადრო, რომ ეროვნულ დღესასწაულზე ხალხს მიაყენო შეურაცხყოფა. კიდევ ერთხელ, ეს სამკუთხედი, როდესაც ამბობს ხალხს, გულისხმობს რადიკალური ოპოზიციის ამომრჩეველს. იქ ქართული ოცნება, მისი ამომრჩეველი, 1 020 000 ადამიანი წაშლილ ჰყავთ საერთოდ თანამედროვე ისტორიიდან, არ მიგვიჩნევენ ხალხად და მოქალაქეებად.

როდესაც უცხო ქვეყნის, განსაკუთრებით კიდევ ამას როცა აკეთებენ მთავრობის ხელმძღვანელები და ხელისუფლების მეთაურები, რომ თავის თავზე იღებენ სხვა ხალხის სახელით საუბარს, ეს არათუ არადემოკრატიული, საქართველოს ერთ მოქალაქესაც კი არ მიუცია მანდატი გერმანიის კანცლერისთვის, საფრანგეთის პრეზიდენტისა და პოლონეთის პრემიერისთვის, არც ერთ ქართველს არ მიუცია მანდატი, რომ მისი სახელით ისაუბროს და ესენი გვესაუბრებიან ქართველი ხალხის სახელით. ეს დემოკრატია კი არ არის, ეს სხვა რაღაცაა, მე-20 საუკუნის დასაწყისის და მე-19 საუკუნის მიდგომებია და არ ვიცი, 21-ე საუკუნეში რანაირად ხდება, რომ ამის ასე სიმორცხვის გარეშე წარმოჩენა ხდება, ჩემთვის გასაკვირია", — განაცხადა შალვა პაპუაშვილმა ტელეკომპანია იმედში (კომენტარს ტაბულა ავრცელებს).