"შევთანხმდით და მივიღეთ პირობა, რომ საჭიროების შემთხვევაში ის დაუბრუნდება სახელმწიფო სამსახურს და კვლავ ჩადგება წინა ხაზზე ქვეყნის სამსახურში", — ამის შესახებ ირაკლი კობახიძემ შინაგან საქმეთა სამინისტროს თანამშრომლებს უთხრა, სადაც უწყების ახალი მინისტრი გელა გელაძე წარადგინა.

მისი თქმით, გომელაურთან "ძალიან მეგობრული ურთიერთობები" აკავშირებდათ და აკავშირებთ.

"ჩვენთვის საწყენი იყო, რა თქმა უნდა, მისი გადაწყვეტილება არა მარტო იმის გამო, რომ ის იყო ძალიან ძლიერი ლიდერი ამ უწყებაში, ძლიერი ხელმძღვანელი, არამედ იმის გამოც, რომ ჩვენ ყველას მასთან გვაკავშირებდა, უფრო სწორად გვაკავშირებს ძალიან მეგობრული ურთიერთობები. შესაბამისად, ადამიანურადაც იყო საწყენი, პროფესიული თვალსაზრისითაც, თუმცა, ამდენი წლის შემდეგ ჩვენთვის გასაგები იყო მისი ეს გადაწყვეტილება. აქვე შევთანხმდით და მივიღეთ პირობა, რომ საჭიროების შემთხვევაში ის დაუბრუნდება სახელმწიფო სამსახურს და კვლავ ჩადგება წინა ხაზზე ქვეყნის სამსახურში, ჩვენი ქვეყნის საზოგადოებრივი უსაფრთხოების სამსახურში და ამისთვისაც მინდა ბატონ ვახტანგს გადავუხადო ძალიან დიდი მადლობა. მას მინდა ვუსურვო ყველაფერი საუკეთესო მის არაჩვეულებრივ ოჯახთან ერთად. ვიტოვებ იმედს, რომ კიდევ ბევრ საქმეს გავაკეთებთ ერთად მომავალში ჩვენი ქვეყნის საკეთილდღეოდ, მადლობა კიდევ ერთხელ!" — განაცხადა კობახიძემ.

შსს-ს მიერ გავრცელებული ინფორმაციით, შეხვედრას ესწრებოდა თავად ვახტანგ გომელაური. მან ირაკლი კობახიძეს, ოცნების გუნდს და შინაგან საქმეთა სამინისტროს თანამშრომლებს "უსაფრთხოებისა და მართლწესრიგის დაცვისთვის დაუღალავი შრომისთვის" მადლობა გადაუხადა.

"მოგეხსენებათ, რომ ათი წელი ცოტა არ არის, ურთულესია თუნდაც უსაფრთხოების სამსახურის მიმართულება, მითუმეტეს ბოლო, რა მოვლენებიც განვითარდა უსაფრთხოების სამსახურში მუშაობის დროსაც და რა თქმა უნდა შინაგან საქმეთა სამინისტროს დროსაც, რაც ბატონმა პრემიერმა ახსენა. ასეთი ბრძოლები რუსთაველზე არ გვქონია, 90-ანი წლების შემდეგ, რაც გვქონდა ნამდვილად და გადავიტანეთ და შევინარჩუნეთ ეს სუვერენიტეტი და სახელმწიფო. მინდა თითოეულ თქვენგანს მადლობა გითხრათ, თქვენს გვერდში ვიქნები ყოველთვის, მე მარტო ვერ გავაკეთებდი თქვენთან ერთად გავაკეთე და თითოეული რიგითიდან დაწყებული დამთავრებული თქვენით, მინდა ყველას მადლობა გითხრათ. კიდევ ერთხელ დიდი მადლობა ბატონო პრემიერო", — განაცხადა ვახტანგ გომელაურმა.

მან გელა გელაძეს თანამდებობაზე დანიშვნა მიულოცა და მომავალ საქმიანობაში წარმატებები უსურვა.

"მინდა გელა გელაძეს მივულოცო და წარმატებები ვუსურვო, არ არის უცხო თქვენთვის, არც ჩემთვის და ჩვენი ოჯახის წევრია ასე ვიტყოდი. როცა საჭირო იქნება თქვენს გვერდში ვიქნები ყოველთვის. წარმატებები, ყოველთვის გამიხარდება თქვენი წარმატება", — აღნიშნა ვახტანგ გომელაურმა.