პოლონეთის საელჩო საქართველოში მყოფ თავისი ქვეყნის მოქალაქეებს დემონსტრაციებში მონაწილეობისთვის ჯარიმებისა და ქვეყნიდან გაძევების შესახებ აფრთხილებს. საელჩომ ასევე დასძინა, რომ აქციის სიახლოვესთან ყოფნაც და სოციალურ ქსელში "გარკვეული აქტივობაც" ქმნის სამართლებრივი დევნის საშიშროებას.

"საქართველოში შესვლაზე უცხოელებისთვის, მათ შორის ევროკავშირის წევრი ქვეყნების მოქალაქეებისთვის უარის თქმის მრავალი შემთხვევის გამო, გთხოვთ, საქართველოში გამგზავრებამდე გაითვალისწინოთ, არსებობს თუ არა თქვენს კონკრეტულ შემთხვევაში ფაქტორები, რომლებიც ზრდის შესვლაზე უარის თქმის რისკს: ეს შეიძლება მოიცავდეს დემონსტრაციებში მონაწილეობას ან მათ სიახლოვეს ყოფნას, ასევე სოციალურ ქსელებში გარკვეულ აქტივობას.

შეგახსენებთ, რომ საქართველოს ხელისუფლებას აქვს სუვერენული უფლება შეაფასოს უცხოელის შესვლის რისკ-ფაქტორები და ასევე, შესვლაზე უარის თქმის გადაწყვეტილება შეიძლება საქართველოში ბინადრობის ნებართვის მფლობელებზეც გავრცელდეს.
ასევე გვსურს აღვნიშნოთ, რომ დემონსტრაციებში მონაწილეობისთვის, თუნდაც სავარაუდო მონაწილეობისთვის, უცხოელებს შეიძლება მძიმე ჯარიმები დაუწესდეთ, ხოლო საქართველოში ხელახლა შესვლა შეიძლება დაუყოვნებლივ გადახდას მოიცავდეს," — ნათქვამია განცხადებაში.

ცნობისთვის, Daily Express-მა 7 აპრილს გვაცნობა, რომ 2024 წელს პროევროპულ აქციებზე დაკავებულ ბრიტანეთის მოქალაქეს, 28 წლის დენიელ ტრევისს, საქართველოს დატოვების და დიდ ბრიტანეთში დაბრუნების უფლებას არ აძლევენ მას შემდეგ, რაც, პოლიციის მტკიცებით, ის პარლამენტში "შეჭრისთვის" 12 დღით საპატიმროში იმყოფებოდა.