კევინ კოსტნერს კასკადიორი დევინ ლაბელა სექსუალური შევიწროების გამო უჩივის. სამშაბათს შეტანილ საჩივარში ლაბელა აცხადებს, რომ გადასაღებ მოედანზე სახელშეკრულებო წესები დაირღვა, როდესაც იგი იძულებული გახდა სექსუალური ძალადობის იმპროვიზებული სცენა შეესრულებინა ინტიმური ურთიერთობის კოორდინატორის გარეშე.

როგორც ლაბელას სარჩელში ვკითხულობთ, 2023 წლის მაისში კასკადიორი დევინ ლაბელა მივიდა Horizon: An American Saga-ის (კევინ კოსტნერის ვესტერნის მეორე ნაწილი) გადასაღებ მოედანზე იმ მოლოდინით, რომ უნდა შეესრულებინა ერთ-ერთი მსახიობის როლი მარტივ სცენებში. თუმცა, როგორც თავად აცხადებს, შოკში ჩავარდა, როცა მოულოდნელად დაევალა დაუგეგმავ, სასტიკი გაუპატიურების სცენაში მონაწილეობა — წინასწარი გაფრთხილების, თანხმობის ან კონტრაქტით სავალდებულო ინტიმური სცენების კოორდინატორის გარეშე.

დევინ ლაბელა

დევინ ლაბელა

ფოტო: iMDB

ლაბელა უჩივის კოსტნერსა და ფილმის მწარმოებელ კომპანიებს სექსუალური დისკრიმინაციის, შევიწროებისა და მტრული სამუშაო გარემოს შექმნის გამო. სარჩელში ასევე აღნიშნულია, რომ ლაბელას მიერ ინციდენტის შესახებ ხმის ამაღლების შემდეგ ის შურისძიების მსხვერპლი გახდა: ლაბელა აღარ დაუბარებიათ დაგეგმილ გადაღებებზე და ფილმის კასკადიორთა კოორდინატორს ის გადასაღებ მოედანზე აღარ დაუბარებია, მიუხედავად იმისა, რომ მასთან თანამშრომლობის გამოცდილება ლაბელას სხვა პროექტებშიც ჰქონდა.

"იმ დღეს, მე აღმოვჩნდი დაუცველი, არაორგანიზებული და ღრმად მოტყუებული იმ სისტემის მიერ, რომელიც უსაფრთხოებასა და პროფესიონალიზმს მპირდებოდა," — განაცხადა ლაბელამ The Hollywood Reporter-თან. "რაც მაშინ დამემართა, დამანგრეველი იყო ჩემი ნდობისთვის და სამუდამოდ შეცვალა ჩემი დამოკიდებულება ამ ინდუსტრიაში ყოფნაზე."

კოსტნერის ადვოკატმა, მარტი სინგერმა, განაცხადა: "ჩემი კლიენტი ყოველთვის ცდილობს, მის ფილმებზე მუშაობისას თავს ყველა კომფორტულად გრძნობდეს და გადასაღებ მოედანზე უსაფრთხოებას უკიდურესად სერიოზულად აღიქვამს." სინგერის თქმით, სარჩელს "არანაირი საფუძველი არ გააჩნია" და იგი "სრულად ეწინააღმდეგება თავად ლაბელას ქმედებებს და ფაქტებს."