"FARA-ს კანონის აღსრულება მოხდება ისე, როგორც ეს ამერიკის შეერთებულ შტატებში ხდება და "გაცილებით მკაცრია პასუხისმგებლობა, ვიდრე წინა შემთხვევაში", — ამის შესახებ ოცნების ერთ-ერთმა ლიდერმა, მამუკა მდინარაძემ განაცხადა.

მისივე თქმით, "ყველა პუნქტი, ყველა სიტყვა, გადმოწერილია ამერიკული კანონიდან, შესაბამისად აღსრულებაც ზუსტად მოხდება ამერიკულად და არა რუსულად".

"როგორც ხდება ამერიკის შეერთებულ შტატებში. გაცილებით მკაცრია პასუხისმგებლობა, ვიდრე წინა შემთხვევაში. ზუსტად ისე, როგორც ხდება აშშ-ში, იმიტომ, რომ ერთი-ერთშია გადმოწერილი კანონი და აღსრულებაც ზუსტად ისე მოხდება, როგორც აშშ-ში. რიგ შემთხვევაში არის სისხლის სამართლის პასუხისმგებლობა, ყველა პუნქტი, ყველა სიტყვა, გადმოწერილია ამერიკული კანონიდან, შესაბამისად აღსრულებაც ზუსტად მოხდება ამერიკულად და არა რუსულად, როგორც ტვინში ჩაუჭედეს ვიღაცებს", — განაცხადა მამუკა მდინარაძემ რუსთავი 2-ის ეთერში.

შეგახსენებთ, რომ უცხოური აგენტების რეგისტრაციის აქტი, FARA კანონი 31 მაისს ამოქმედდება და მისი აღსრულება ანტიკორუფციულმა სამსახურმა უნდა განახორციელოს.