შუაღამისას, კანუდოს ბარში პოლიციელების მიერ ამოღებულ ნივთიერებაზე, რომელზეც თვითმხილველები ამბობენ, რომ ქსანაქსია, ექსპერტიზის პასუხები ჯერ კიდევ უცნობია. ხოლო პირი, რომელსაც აღნიშნული ნივთიერება ეკუთვნოდა, გიორგი გიორგიძე კვლავ წინასწარი დაკავების იზოლატორში იმყოფება.

შინაგან საქმეთა სამინისტროს ინფორმაციით, გამოძიება 260-ე მუხლით მიმდინარეობს, რაც ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღებას გულისხმობს.

გიორგი გიორგიძე მაშინვე გათავისუფლდება, თუ ექსპერტიზა უარყოფს, რომ ამოღებული ნივთიერება ნარკოტიკული საშუალებაა.

თვითმხილველები, გუშინ, ასევე, აცხადებდნენ, რომ პოლიციელები დაკავებული პირისთვის ნარკოტიკული საშუალების ჩადებას ცდილობდნენ.

"მთელმა კანუდოსმა დაინახა, როგორ მოხსნეს ტიპი მოძრავი ტრანსპორტიდან. უკუღმა ჰყავდათ დაკიდებული, თავს ურტყამდა ძირს. გვაქვს ძალიან საფუძვლიანი ეჭვი, რომ რაღაცის ჩადებას ცდილობდნენ, მაგრამ ამის საშუალება არ მივეცით"; "გადააგდეს მოპედიდან, არც გააჩერებინეს მოპედი, გასაღებიც დაიკარგა. გაჩხრიკეს, საერთოდ ვერაფერი უპოვეს. ძალიან დიდი ხანი იდგნენ, მაგრამ ვერაფერი. საუბარია თეთრ ნივთიერებაზე, რაც არის ქსანაქსი, ანუ დამამშვიდებელი წამალია", - აცხადებდნენ თვითმხილველები.