"ეკონომიკური პოლიტიკის კვლევის ცენტრის" (EPRC) კვლევის თანახმად, 2026 წლის მეორე კვარტალში საქართველოში ტურისტული სეზონი ვიზიტორების რაოდენობისა და შემოსავლების კლებით დაიწყო. ორგანიზაციაში აღნიშნავენ, რომ ბოლო თვეების სტატისტიკა კიდევ ერთხელ ადასტურებს ევროპულ, სტაბილურ და მაღალბიუჯეტურ ბაზრებზე ორიენტირების აუცილებლობას.

კვლევის მიხედვით, ტურისტული ვიზიტების კლების მაჩვენებელმა 2.7% შეადგინა, ხოლო ზოგადი მოგზაურობის — 4.9%. შესაბამისად, ტურიზმიდან მიღებული შემოსავლები 3.8%-ით შემცირდა. ორგანიზაციაში განმარტავენ, რომ ამის მიზეზი ახლო აღმოსავლეთსა და ე.წ. ტრადიციული ბაზრების ქვეყნებში არსებული არასტაბილური გარემოა.

EPRC-ის ცნობით, ტურიზმის ეროვნული ადმინისტრაციის მონაცემები აჩვენებს, რომ 2026 წლის იანვარ-ივნისის პერიოდში შემოსავლები რაოდენობრივად ყველაზე მეტად სწორედ ევროკავშირიდან და დიდი ბრიტანეთიდან გაიზარდა და რეკორდულ 335.7 მლნ აშშ დოლარს მიაღწია (ზრდა 21.2%).

მხოლოდ მეორე კვარტალში ამ ბაზრიდან მიღებული შემოსავალი 12.1%-ით გაიზარდა და 194.9 მლნ აშშ დოლარს გაუტოლდა.

"ბოლო თვეების სტატისტიკამ კიდევ ერთხელ დაადასტურა, რომ სტაბილურ და მაღალბიუჯეტურ ბაზრებზე არჩევანი, რაც ევროპულ არჩევანს ნიშნავს, ქვეყნის ეკონომიკისთვის ყველაზე მნიშვნელოვანია. მით უმეტეს, იგივე სტატისტიკა აჩვენებს, რომ ევროპელი და დიდი ბრიტანელი ტურისტი, საშუალოდ, საქართველოში რუს ტურისტზე 3-4-ჯერ მეტ ფულს ხარჯავს", — აღნიშნულია კვლევაში.

საშუალო დანახარჯები ქვეყნების მიხედვით (2025 წლის მონაცემები)

კვლევაში ხაზგასმულია, რომ რეალური ეკონომიკური ეფექტის შეფასებისას მთავარი მაჩვენებელი ერთ ვიზიტორზე გაწეული საშუალო დანახარჯია:

ისრაელი — 1,457 აშშ დოლარი
ევროკავშირი და დიდი ბრიტანეთი — ~1,321 აშშ დოლარი
ჩინეთი — 660 აშშ დოლარი
რუსეთი — 439 აშშ დოლარი

EPRC-ის ანალიზის თანახმად, რუსეთიდან და ჩინეთიდან ჩამოსული ტურისტების მიერ დახარჯული თანხის მნიშვნელოვანი ნაწილი საქართველოს ეკონომიკაში არ რჩება.

"ეკონომიკური პოლიტიკის კვლევის ცენტრის" დასკვნით, საქართველოს ტურისტული პოლიტიკის მთავარი პრიორიტეტი უნდა იყოს მაღალგადამხდელუნარიანი და სტაბილური ბაზრების მოზიდვა, რაც ქვეყანას მეტ ეკონომიკურ სარგებელს, მეტ სამუშაო ადგილსა და უსაფრთხოების ნაკლებ რისკებს მოუტანს.

EPRC-ის კვლევა სრულად იხილეთ აქ.