მოკლედ: უკრაინის უსაფრთხოების სამსახურის ინფორმაციით, აღმოაჩინეს კორუფცია, სამხედროების მიერ, დაახლოებით, 40 მილიონი დოლარის ღირებულების იარაღის შესყიდვაში.

დეტალები: მათი თქმით, იძიებენ საქმეს, რომელშიც ჩართულია თავდაცვის სამინისტროს 5 მაღალჩინოსანი და იარაღით მომმარაგებელი კომპანია.

  • უსაფრთხოების სამსახურის ცნობით, თავდაცვის სამინისტროს წარმომადგენლებმა 2022 წელს ხელი მოაწერეს კონტრაქტს 100 000 ნაღმმტყორცნის თაობაზე.
  • თანხა წინასწარ გადაიხადეს, თანხის ნაწილი საზღვარგარეთაც გადაირიცხა, თუმცა იარაღი უწყებისთვის არ მიუწოდებიათ.
  • უკრაინის უსაფრთხოების სამსახურის განმარტებით, გამოძიებამ ამხილა თავდაცვის სამინისტროს ოფიციალური პირები და იარაღის მიმწოდებელი კომპანიის, ლვოვის არსენალის მენეჯერები, "რომლებმაც, ჭურვების შესყიდვისას, თითქმის 1.5 მილიარდი გრივნა მიითვისეს".

    "გამოძიების თანახმად, გაფლანგვაში მონაწილეობენ თავდაცვის სამინისტროს ყოფილი და მოქმედი მაღალჩინოსნები და შვილობილი კომპანიების ხელმძღვანელები", — ამბობენ უსაფრთხოების სამსახურში.
  • მიუხედავად იმისა, რომ ჭურვების შესახებ კონტრაქტი უკრაინაში ომის დაწყებიდან 6 თვის შემდეგ გააფორმეს, შეიარაღებას ამ შეთანხმებით გათვალისწინებული არცერთი ჭურვი არ მიუღია.
  • უწყების ინფორმაციით, ერთ-ერთი ეჭვმიტანილი მაშინ დააკავეს, როდესაც ქვეყნის დატოვებას გეგმავდა.
  • უკრაინის გენერალური პროკურორის განცხადებით, მოპარული თანხა თავდაცვის ბიუჯეტს დაუბრუნდება.

ბოლო ხაზი: კორუფცია უკრაინისთვის ერთ-ერთი უდიდესი პრობლემაა, წლების განმავლობაში. პრეზიდენტმა ვოლოდიმირ ზელენსკიმ , 2019 წელს, ქვეყნის სათავეში მოსვლისას განაცხადა, რომ კორუფციასთან ბრძოლა მისთვის პრიორიტეტებს შორის იქნებოდა.

  • კორუფციული სქემა ამხილეს იმ ფონზე, როდესაც ამერიკელი რესპუბლიკელები ცდილობენ შეაჩერონ პრეზიდენტ ბაიდენის მცდელობა, მეტი დახმარება გაუგზავნოს უკრაინას.
  • კვლევითი ორგანიზაციის Transparency International-ის მიხედვით, 2022 წლის კორუფციის აღქმის ინდექსში, უკრაინა 180 ქვეყანას შორის, 116-ე ადგილზე იყო.

მსგავსი: ზალუჟნის თანამდებობიდან მოხსნის შესახებ ინფორმაცია არ დასტურდება