რა ხდება: მარინა ხატიაშვილმა On.ge-ს უთხრა, რომ გამოსახლების პროცესში ფიზიკური დაზიანება მიიღო, რის გამოც, სასწრაფო დახმარების ბრიგადის გამოძახება გახდა საჭირო.

• მარინა ხატიაშვილი და მისი ოჯახი აღსრულების პოლიციამ დღეს ფიზიკური ძალის გამოყენებით გამოასახლა კეკელიძის #1-ში მდებარე საცხოვრებელი სახლიდან.
• პროცესს წინააღმდეგობას უწევდნენ მოქალაქეები, აქტივისტები.
• აღსრულების პოლიციასთან მოქალაქეთა წინააღდმეგობისას, დააკავეს რამდენიმე პირი, მათგან ზოგი — გასახლების პროცესის დაწყებამდე.
• არსებობს კადრები, რომელშიც ჩანს, რომ პოლიციელმა უხეში ძალის გამოყენებით ძირს ჩააგდო ონლაინ-პლატფორმა მაუწყებლის ჟურნალისტი, რატი რატიანი, რითაც საფრთხე შეუქმნა მის ჯანმრთელობასა და სიცოცხლეს.

დეტალები: მარინა ხატიაშვილი ამ დროისათვის აღარ იმყოფება კეკელიძის ქუჩაზე. ის ერთ-ერთ ტელევიზიის შენობაშია და ემზადება პირდაპირი ჩართვისთვის.

მან მოგვიყვა ზოგიერთ დეტალზე და გვითხრა, რომ:

• გამოსახლებისას, აღსრულების პოლიცია იყენებდა ფიზიკურ ძალას.
• "რაღაცნაირად, ხელით მათრევდნენ, ამ დროს ფეხი ამიცდა, წავიქეცი და კეფა დავარტყი. გავითიშე და სასწრაფოში გავახილე თვალი, იქ მოვედი გონს", — თქვა მან On.ge-სთან.
• ხატიაშვილის თქმით, მის საცხოვრებელ ბინაში აღსრულების პოლიციის შეჭრის შემდეგ, საოჯახო ნივთების ნაწილი განადგურებულია, ისევე, როგორც საოჯახო ბიბლიოთეკა: "ქუჩაში ყრია ყველაფერი, ჩემი წინაპრების ნივთები, ჩემი ნივთები, რარიტეტული (*იშვიათი) ბიბლიოთეკაზე წიხლით არიან გადავლილები", — ამბობს ხატიაშვილი.

მარინა ხატიაშვილს ვკითხეთ, მიიღო თუ არა შესაბამისი სახელმწიფო უწყებებისგან ალტერნატიული საცხოვრებელი ფართით უზრუნველყოფის შესახებ წინადადება, რაზეც გვითხრა, რომ — არა. "არც მჭირდება ბიძინა ივანიშვილის სერვისები. არც შემოუთავაზებია სახელმწიფოს ალტერნატიული საცხოვრებელი. მეგობართან დავრჩები", — ამბობს ის.

რა ხდება ახლა კეკელიძეზე: ადგილზე ისევ რჩებიან მოქალაქეები და აქტივისტები. ისინი მოუწოდებენ მოსახლეობას, შეუერთდნენ პროტესტს. იქ არიან პლატფორმა კომენტარის წარმომადგენლებიც, რომლებიც მიიჩნევენ, რომ ცალკეული ოჯახების პრობლემები საკანონმდებლო ცვლილებებმა უნდა გამოასწოროს.

• ვახუშტი მენაბდის თქმით, რომელიც ერთ-ერთია ადგილზე მყოფ აქტივისტთა შორის, ამბობს, რომ კანონდებლობა მორგებულია მევახშეების ინტერესებზე. "ვნახეთ ეს უსამართლობა, რომ ოჯახს სესხის ძირზე სამჯერ მეტი აქვს გადახდილი, მაგრამ ვნახეთ, რა ფორმებით მოხდა მათი გამოსახლება ამ ზამთარში. ბევრ ქვეყანაში ზამთარში მოქალაქეთა გამოსახლება აკრძალულია. ჩვენი კანონმდებლობა არის შესაცვლელი და ის ადამიანზე ორიენტირებული უნდა გახდეს", — უთხრა On.ge-ს ვახუშტი მენაბდემ, პლატფორმა კომენტარის თანადამფუძნებელმა.

ვახუშტი მენაბდეს ვკითხეთ,

როგორი იქნებოდა ასეთ ვითარებაში სახელმწიფოს საუკეთესო მიდგომა გამოსახლებულ ოჯახებთან მიმართებით, რადგან, ოფიციალურ უწყებებს, ამ დრომდე არაფერი უთქვამთ, უზრუნველყოფენ თუ არა მათ ალტერნატიული საცხოვრებელი ფართით: "სახელმწიფო ვალდებულია, უსახლ-კარო ადამიანს, ვისაც არ აქვს ფინანსური შესაძლებლობა, გამოუყოს საცხოვრებელი. შესაბამის ვალდებულებას აკისრებს კანონი ადგილობრივ თვითმმართველობას", — გვითხრა მან.