BBC-ის მიერ ახლახან მოპოვებულ ვიდეოში, რომელიც 2022 წელს არის გადაღებული, ჩრდილოეთ კორეაში ორი 16 წლის ბიჭის გასამართლება არის ნაჩვენები. ვიდეოში ვხედავთ, რომ ასობით სტუდენტის წინ თინეიჯერები ხელბორკილებით დგანან და ოფიცრების ბრალდებას ისმენენ.

თინეიჯერების დაკავების მიზეზი არც მეტი, არც ნაკლები სამხრეთკორეული სერიალის ყურებაა. 16 წლის ბიჭებს ოფიცრები იმაზე საყვედურობენ, რომ ისინი თავიანთ შეცდომას სიღრმისეულად ვერ იაზრებენ, რის გამოც დასჯა ელოდებათ.

შეგახსენებთ, რომ ჩრდილოეთ კორეაში სამხრეთკორეული ფილმების, სერიალებისა და ნებისმიერი გასართობი შოუს ყურება აკრძალულია. BBC-ის მიერ მოპოვებულ ვიდეოში კი ჟურნალისტი იმეორებს, რომ "მარიონეტული რეჟიმის კულტურამ მოზარდებში შემოაღწია, რის გამოც 16 წლის თინეიჯერებმა საკუთარი მომავალი უკვე დაანგრიეს".

ჩრდილოეთ კორეაში 2020 წელს მიღებული კანონის თანახმად, სამხრეთკორეული გასართობი კონტენტის გავრცელება ან ყურება სიკვდილით ისჯება. მართალია, დაკავებული თინეიჯერები სიკვდილით დასჯას გადაურჩნენ, თუმცა მათ 12-წლიანი მძიმე შრომა დაეკისრათ.