16-18 იანვარს ილიას სახელმწიფო უნივერსიტეტში ილიაუნის უმაღლესი კვლევების ცენტრის ორგანიზებით გაიმართება სერგო ფარაჯანოვის დაბადებიდან 100 წლის იუბილესადმი მიძღვნილი კონფერენცია „ზღვრების გადაკვეთა".

კონფერენციაზე კინოსა და კულტურის ქართველი და საერთაშორისო სპეციალისტები — ჯეიმს სტეფენი, პატრიკ კაზალი, თეო ხატიაშვილი, ქეთი შავგულიძე, ვერონიკა ჟურავლიოვა, გიორგი მაისურაძე, ნიკოლოზ ნადირაშვილი, ოლგა ბრიუხოვეცკა, გოგი გვახარია, ზაალ ანდრონიკაშვილი, გიგა ზედანია —განიხილავენ ფარაჯანოვის შემოქმედების სხვადასხვა ასპექტს, რათა უკეთ გამოკვეთონ მისი ხელოვნების უნიკალური ფორმა, რომელიც თავის მომაჯადოებელ ხასიათს დღემდე ინარჩუნებს.

საზღვრების გადალახვა და წითელი ხაზების გადაკვეთა სერგო ფარაჯანოვის ცხოვრებისა და ხელოვნების საერთო მახასიათებელია. ის თავად იყო განსხვავებული იდენტობებისა და მიკუთვნებულობების გადაკვეთაზე — თბილისში დაბადებული ეთნიკური სომეხი, რომელმაც თავისი პირველი მნიშვნელოვანი ფილმი უკრაინაში, უკრაინული ფოლკლორის მოტივებზე გადაიღო. მისი დანარჩენი სამი მნიშვნელოვანი სრულმეტრაჟიანი ფილმიდან ერთი ეძღვნება საიათნოვას, სამენოვან თბილისელ სომეხ პოეტს, მეორე წარმოადგენს ქართული ლიტერატურულად დამუშავებული ლეგენდის თავისებურ ეკრანიზაციას, ხოლო მესამე — თურქული ლეგენდის გადააზრებას.

პოსტსტალინურ საბჭოთა კავშირში მისი სოციალური ქცევის სკანდალური ნონკონფორმიზმი და კინოხელოვნების სრულიად განუმეორებელი, მხოლოდ მისთვის დამახასიათებელი ინდივიდუალური სტილი, აგებული კოლაჟისა თუ tableu vivant-ის (ცოცხალი სურათის) ესთეტიკაზე, წარმოადგენდა ასაფეთქებელ ნაზავს, რომელმაც მძიმე დაღი დაასვა დიდი რეჟისორის ცხოვრებას, მაგრამ მისი ფილმები გლობალური მნიშვნელობის ნაწარმოებებად აქცია.

სამუშაო ენები: ქართული, ინგლისური(უზრუნველყოფილი იქნება სინქრონული თარგმანი)

16 იანვარი — ილიას სახელმწიფო უნივერსიტეტის G106 აუდიტორია, გ. წერეთლის N1

17-18 იანვარი — ილიას სახელმწიფო უნივერსიტეტის S800 აუდიტორია, გიორგი წერეთლის N3

დასწრება თავისუფალია.