რა ხდება: ცნობილია იმ ისრაელელი ტყვეების ვინაობა, რომლებიც მათივე ქვეყნის ჯარმა ტერორისტად მიიჩნია და ცეცხლი გაუხსნა.

  • ისინი 28 წლის იოთამ ჰაიმი, 22 წლის სამერ თალაკა და 26 წლის ალონ შამრიზი არიან.
  • ტყვეები ქალაქ ღაზაში მოკლეს.

დეტალები: ისრაელის შეიარაღებული ძალების წარმომადგენელი, რომელიც ანონიმურ წყაროდ რჩება, ჰყვება, რომ მძევლები, რომლებიც შენობიდან გამოვიდნენ, წელს ზემოთ შიშვლები იყვნენ.

  • მათ ხელში ეჭირათ ჯოხი, რომელზეც თეთრი ნაჭერი იყო ჩამოკიდებული.
  • წყაროს ინფორმაციით, იმის გამო, რომ მძევლები ძალიან ახლოს იყვნენ, ერთ-ერთი ჯარისკაცს შეეშინდა, ისინი ტერორისტებად მიიჩნია და ცეცხლი გაუხსნა.
  • კვირას, ისრაელის თავდაცვის ძალებმა (IDF) განაცხადა, რომ შენობაში ჩხრეკა ჩატარდა, სადაც იპოვეს თეთრ ნაჭერზე საჭმლის ნარჩენებით დაწერილი SOS და "გვიშველეთ, 3 მძევალი".

ზეწოლა ისრაელის მთავრობაზე: დეკემბრის დასაწყისში, ისრაელსა და ჰამასს შორის დროებითი ცეცხლის შეწყვეტის დასრულების შემდეგ, მძევლების ოჯახებმა ისრაელის მთავრობას მოუწოდეს, დადოს ახალი ზავი, ტყვეების ნაწილის გასათვისუფლებლად. ზავის დროს, ჰამასმა, ისრაელის ციხეებში მყოფი პალესტინელების გათავისუფლების სანაცვლოდ, 100-ზე მეტი ტყვე გამოუშვა, თუმცა, დაახლოებით 120 ადამიანი კვლავ მძევლად რჩება.

  • ისრაელის პრემიერ-მინისტრმა ბენიამინ ნეთანიაჰუმ მეორე ზავის შესახებ მოთხოვნა არ გაიზიარა და განაცხადა, რომ "სამხედრო ზეწოლა აუცილებელია, როგორც მძევლების დასაბრუნებლად, ასევე — გამარჯვებისთვის“.
  • პალესტინის მშვიდობიანი მოსახლეობის უდიდესი მსხვერპლის ფონზე, ისრაელის ხელისუფლება მოექცა მზარდი საერთაშორისო ზეწოლის ქვეშ, მათ შორის, მთავარი მოკავშირის, აშშ-ის მხრიდან.
  • კვირას ისრაელში ჩავიდა საფრანგეთის საგარეო საქმეთა მინისტრი კეტრინ კოლომა, რომელმაც განაცხადა, რომ საჭიროა ხანგრძლივი ზავის დადება, დაუყოვნებლივ.
  • მისმა ისრაელელმა კოლეგამ, ელი კოენმა კი თქვა, რომ ცეცხლის შეწყვეტა ახლა შეცდომა და "ჰამასისთვის საჩუქარი" იქნებოდა.
  • ცეცხლის შეწყვეტისკენ მოუწოდებენ ისრაელს დიდი ბრიტანეთი და გერმანიაც.

რა მდგომარეობაა ახლა ღაზის სექტორში: ისრაელის დაბომბვის შედეგად, უდიდესი ტერიტორიებია განადგურებული. გაერო ამბობს, რომ მოსალოდნელია ჰუმანიტარული კატასროფა, რადგან ღაზაში ვერ შეაქვთ დახმარება.

  • პალესტინის ჯანდაცვის მინისტრი აცხადებს, რომ კვირას, ისრაელის ავიადარტყმებს, ჯაბალიას დევნილთა ბანაკში 90 ადამიანი ემსხვერპლა.
  • სულ, ომის დაწყების შემდეგ, ღაზაში 18 000-ზე მეტი პალესტინელი დაიღუპა.