Porte ინოვაციაა, რომელიც სწრაფად განვითარებად ტურისტულ ბაზარზე მცირე და საშუალო ბიზნესებს ეხმარება, გაზარდონ საკუთარი ეფექტურობა და შექმნან მომხმარებელზე მორგებული გამოცდილება. შეიძლება ითქვას, რომ Porte ერთგვარი "ციფრული კონსიერჟია" — აპლიკაცია ერთდროულად იძლევა შესაძლებლობას, თქვენივე სმარტფონის მეშვეობით ისარგებლოთ სასტუმროს ოთახის ციფრული გასაღებით და თან გაიაროთ სასტუმროში რეგისტრაცია, გამოიძახოთ ოთახის სერვისი და დატოვოთ შეფასება.

Porte იმდენად მრავალფუნქციურია, რომ სამუშაო ძალის დანაკლისის ნაწილობრივ შევსების პოტენციალი აქვს, რასაც განსაკუთრებული მნიშვნელობა ენიჭება პატარა სასტუმროების მფლობელებისთვის. ამასთანავე, Porte-თი სასტუმროებს ციფრული გასაღებით სარგებლობა არსებული საკეტების გამოცვლის გარეშე შეუძლიათ. ციფრული გასაღებები კი ოთახებს მაქსიმალურად იცავს. აღსანიშნავია, რომ აპლიკაციის საშუალებით ავტომატიზებული პროცესი მაქსიმალურად ამცირებს მოგზაურობისას ენის ბარიერით გამოწვეულ გაურკვევლობებსაც.

Porte-ს შესაძლებლობების შესახებ უფრო დეტალურად სტარტაპის აღმასრულებელი დირექტორი, აიდანა აითუაროვა გაგვესაუბრა.

მოგვიყევით, როგორ შეიქმნა Porte?

Porte-ს არსებობა, პირველ რიგში, ტექნოლოგიამ განაპირობა. ფანტასტიკური გუნდი გვყავს, რომელსაც შეუძლია, ნებისმიერ მოწყობილობას მოარგოს ჩვენი ტექნოლოგია და ყველა კარი გააღოს. თავიდან ვეცადეთ, ჩვენი ინოვაციური გამოგონება საცხოვრებელი კომპლექსებისა და სავაჭრო ცენტრებისთვის მიგვეყიდა, რაც პრინციპში, გამოგვივიდა კიდეც. თუმცა, ხან პროცესი დროში იწელებოდა, ხან კი არასაკმარისი მოგება გვრჩებოდა. ასე რომ, გადავწყვიტეთ, ახალ სექტორზე გასვლა და გადავერთეთ სასტუმროებზე.

ბევრი სასტუმრო უკვე ისედაც ეძებდა გასაღების ციფრულ ალტერნატივას, თუმცა ამისთვის საკეტის გამოცვლა იყო აუცილებელი, რაც საკმაოდ ძვირია. Porte-ს წყალობით, საკეტების შეცვლა საერთოდ არ არის საჭირო, რადგან ჩვენი ტექნოლოგია თავისუფლად ერგება ნებისმიერ არსებულ საკეტს.

Porte-ს მეშვეობით სასტუმროები, სასტუმროს მიმღებები (ე. წ. რესეფშენები) ნაკლებად დაიტვირთებიან. ამ ინსტრუმენტის გამოყენებას დამატებითი შემოსავლის მოტანაც შეუძლია, რადგან ისეთი სერვისები, როგორებიცაა რესტორანი, სპა და სამრეცხაო, პირდაპირ სტუმრის ჯიბეშია მოთავსებული და ერთი ხელის მოსმით შეუძლია განახორციელოს სასურველი შეკვეთა. ეს მრავალფუნქციურობა ეხმარება Porte-ს დანერგოს სასტუმროში ყოვლისმომცველი, აწყობილი სისტემა, რაც უკეთეს შეფასებებსა და მომხმარებელთა კმაყოფილებაზე აისახება.

რა გზა გამოიარა Porte-მ 500 Georgia-მდე და რა არის სტარტაპის მიზანი?

სხვათა შორის, 500 Georgia-ს პროგრამაში მონაწილეობის მიღებამდე რამდენიმე ინვესტორი უკვე მოძებნილი გვყავდა, ვგეგმავდით MENA-ში მონაწილეობასაც, მაგრამ 500 Georgia უბრალოდ უკეთეს შესაძლებლობებს გთავაზობდა — მტკიცე კავშირების ჩამოყალიბებას და ყველა იმ ბაზარზე წვდომას, სადაც 500 Global-ი ოპერირებს. პროექტის მეორე ფაზაში ასტანას Digital Bridge-შიც მივიღეთ მონაწილეობა და "ყველაზე ინვესტირებადი" სტარტაპის ტიტულიც დავიმსახურეთ. ძალიან გვინდა შუა აზიასა და ჩრდილოეთ აფრიკაში სასტუმრო აპლიკაციებში პირველები ვიყოთ და ვიტყოდი, რომ ეს მიზანი არც ისე შორსაა.

ინფორმაციისთვის, საქართველოს ბანკის, GITA-ს და 500 Global-ის თანამშრომლობით, საქართველოში სტარტაპების გლობალური აქსელერაციის პროგრამა 500 Georgia-ს სახელით წელს უკვე მეხუთედ ხორციელდება. 12 კვირიანი, ინტენსიური პროგრამის ფარგლებში შერჩეული სტარტაპები საერთაშორისო დონის აქსელერაციის ექსპერტებთან ერთად მუშაობენ საკუთარი ბიზნესის სწრაფი ზრდის, განვითარებისა და ფონდების მოზიდვის სტრატეგიების შემუშავებაზე.