პრეზიდენტმა ილჰამ ალიევმა განაცხადა, რომ 2024 წელს ქვეყანაში ვადამდელი არჩევნები გაიმართება. მას პრეზიდენტობის მეოთხე ვადა 2025 წელს ეწურება.

ალიევმა განაცხადა, რომ არჩევნები 2024 წლის 7 თებერვალს გაიმართება.

ის პრეზიდენტის პოსტს 2003 წლიდან იკავებს.

2009 წელს, საჯარო რეფერენდუმის შედეგად, აღარ არსებობს ლიმიტი, თუ რამდენი ვადით შეუძლია თანამდებობაზე ყოფნა პრეზიდენტს. 2016 წელს ჩატარებულმა რეფერენდუმმა კი საპრეზიდენტო ვადა 7 წლამდე გაზარდა.

2016 წლის რეფერედუმის შედეგად, ასევე, შეიქმნა ვიცე-პრეზიდენტის ოფისი, რომელიც 2017 წლიდან ალიევის ცოლს, მეჰრიბან ალიევას უკავია.

ალიევი ბოლოს 2018 წელს აირჩიეს, მან ხმების 86% პროცენტი მიიღო. არჩევნებს ბოიკოტი გამოუცხადეს აზერბაიჯანის უმსხვილესმა ოპოზიციურმა პარტიებმა.

ჯერჯერობით, არ არის ცნობილი მიზეზი, რის გამოც თებერვალში ვადამდელი არჩევნები უნდა გაიმართოს.

ალიევის განცხადებამდე სამი თვით ადრე აზერბაიჯანმა მთიან ყარაბაღში ომი დაიწყო. მას შემდეგ, რაც რეგიონი დანებდა, სომეხმა მოსახლეობამ საცხოვრებლები მასობრივად დატოვა.

ასევე, გასათვალისწინებელია ის ფაქტიც, რომ ამჟამად, აზერბაიჯანში დამოუკიდებელ მედიასაშუალებების ოფისებში რეიდები მიმდინარეობს და დაპატიმრებული არიან ჟურნალისტები.

ორი კვირის წინ, სამართალდამცველებმა გაჩხრიკეს "აბზასმედიას" ოფისები — ეს გამოცემა ერთ-ერთი ბოლო დამოუკიდებელი მედიაორგანიზაციაა, რომელიც ქვეყანაში მუშაობს. დააპატიმრეს მენეჯმენტის ზედა რგოლის წარმომადგენლები და თანაშრომლები, მათ ფულის კონტრაბანდა ბრალდებათ. ასევე, სულ ცოტა ხნის წინ დააკავეს ონლაინტელევიზია"კანალ 13-ის" დამფუძნებელი.

ოპოზიციური პარტიის "სახალხო ფრონტი" თავმჯდომარე, ალი ქარიმლი ამბობს, რომ განცხადება უკავშირდება როგორც არჩევნების გაყალბების მცდელობას, ასევე, რუსეთთან ქვეყნის მზარდ კავშირს.

"ახლა ცხადი ხდება, რატომ დადგა ქვეყნის დღის წესრიგში, ბოლო თვეების განმავლობაში, უკანონო დაპატიმრებები, და ასევე, რატომ დაიძაბა აზერბაიჯანის ურთიერთობა ხელოვნურად საერთაშორისო ორგანიზაციებთან, როგორიც არის ევროკავშირი, ეუთო, აშშ", — დაწერა ქარიმლიმ.

მან, ასევე, დასძინა, რომ გადაწყვეტილების "საიდუმლო" და მოულოდნელი ხასიათი მიუთითებს იმაზე, რომ აზერბაიჯანის მთავრობას ეშინია პოლიტიკური კონკურენციისა, მიუხედავად ოპოზიციურ ჯგუფებსა და დამოუკიდებელი მედიაზე ზეწოლისა.

ქარიმლი, ასევე, ვარაუდობს, რომ ალიევის განცხადება, ვადამდელი არჩევნების შესახებ, უკავშირდება რუსეთის სამხედრო დამარცხების ალბათობას, უახლოეს მომავალში.

"ილჰამ ალიევი ცდილობს, გაიგრძელოს უფლებამოსილების ვადა არაკონკურენტული და ყალბი არჩევნების გზით, სანამ პუტინის რეჟიმი ჯერ კიდევ დგას", — თქვა მან.

დამოუკიდებელი პოლიტიკოსი და ბაქოში დაფუძნებული პოლიტიკური მართვის ინსტიტუტის დირექტორი, აზერ გასიმლი, ასევე, უკავშირებს გადაწყვეტილებას ალიევის "არჩევანს რუსეთის სასარგებლოდ“. თუმცა, მან თქვა, რომ არჩევნების ერთი წლით ადრე ჩატარების გადაწყვეტილება, პირველ რიგში, მიუთითებს ალიევის შფოთებს, თუ როგორი იქნება მომდევნო წელი.

"წელს დსთ-ს ქვეყნებში ეკონომიკური ზრდა ძალიან დაბალი იყო. ქვეყანაში ეკონომიკური უფსკრული და, შედეგად, სოციალური დაძაბულობა იზრდება. ხელისუფლებამ მთიანი ყარაბაღის გამარჯვება განვითარებად ვერ აქცია“, — წერს გასიმლი.

ის, ასევე, არ გამორიცხავს, რომ სომხეთ-აზერბაიჯანის საზღვარზე კონფლიქტს კვლავ ჰქონდეს ადგილი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.