აზერბაიჯანის პოლიციამ AbzasMedia-ს მეოთხე თანამშრომელი დააკავა, მას შემდეგ, რაც გასულ კვირას სამართალდამცველები მათ ოფისებში შეიჭრნენ და მენეჯმენტის წევრები დააკავეს.

დღეს 25 წლის ჟურნალისტს, ნარგიზ აბსალამოვას, ჯგუფური კონტრაბანდის ბრალდებით, 3-თვიანი წინასწარი პატიმრობა შეეფარდა.

აბზასმედიას დირექტორი ულვი ჰასანლი, მთავარი რედაქტორი სევინჯ ვაგიფგიზი და დირექტორის მოადგილე მაჰამად კეკალოვი, ამავე ბრალდებით, გასულ კვირას დააკავეს.

აბსალამოვა კი უცხოური ვალუტის კონტრაბანდის შესახებ გამოძიების ფარგლებში, ბაქოს პოლიციის დეპარტამენტში გუშინ დაიბარეს და გუშინვე დააკავეს.

ჟურნალისტები, რომლებიც პოლიციის განყოფილებასთან იყვნენ შეკრებილი, ამბობენ, რომ აბსალამოვა შენობიდან პოლიციამ ხატაის პოლიციის დეპარტამენტში გადაიყვანა.

ფოტო: Khayala Aghayeva

აბსალამოვას, რომელიც მანამდე მოწმის სტატუსით, თავისივე კოლეგების წინააღმდეგ აღძრული საქმის ფარგლებში დაკითხეს, ადვოკატი თან არ ჰყავდა.

პოლიციამ გასულ კვირას დააკავა აბზასმედიას რამდენიმე ხელმძღვანელი პირი, ასევე, რეიდები მოაწყვეს კომპანიის ოფისებში.

ჩხრეკისას, სამართალდამცველების მტკიცებით, იპოვეს 40 ათასი ევრო. გამოცემაში ამბობენ, რომ ეს თანხა მათ ყალბი მტკიცებულების შესაქმნელად ჩაუდეს.

აბზასმედია ცნობილია ჟურნალისტური გამოძიებებით, რომელიც, მათ შორის, ალიევის ოჯახის ბიზნესგარიგებებს ეხება. ისინი, ასევე, აშუქებდნენ კორუფციის ფაქტებს, მთიანი ყარაბაღის რეკონსტრუქციის სამუშაოების დროს 2020 წელს.

აზერბაიჯანის პოლიციამ, ასევე, დააკავა "კანალ 13-ის" დამფუძნებელი, აზიზ ორუჯოვი. მას ბრალად ედება სახლის აშენება ნებართვის გარეშე.

აბსალამოვა კი უკვე მეოთხე ჟურნალისტია, რომელიც აზერბაიჯანში ბოლო 10 დღის განმავლობაში დააკავეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.