"აბზასმედიაში" რეიდიდან და კომპანიის მენეჯმენტის დაკავებიდან ერთი კვირის შემდეგ, აზერბაიჯანის პოლიციამ დააკავა დამოუკიდებელი ონლაინ ტელეარხის, Kanal 13-ის დამფუძნებელი და დირექტორი.

აზიზ ორუჯოვი ბაქოში ორშაბათს დააკავეს. სამშაბათს სასამართლომ მას 3-თვიანი წინასწარი პატიმრობა შეუფარდა, სახლის უკანონო მშენებლობის გამო. ბრალის დამტკიცების შემთხვევაში, მას 3-წლიანი პატიმრობა ელის.

ორუჯოვის ადვოკატი, ბაჰრუზ ბაირამოვი ამბობს, რომ ბრალდება "კანალ 13-ის" მუშაობის შესაფერხებლად წარუდგინეს. მისივე თქმით, ორუჯოვის წინასწარი პატიმრობის შესაფარდებლად არანაირი მიზეზი არ არსებობს. "მისი საცხოვრებელი ადგილი ცნობილია, მას არ შეუძლია, გაიქცეს და დაიმალოს", — თქვა მან.

ორშაბათს, დაკავებამდე, პოლიციამ გაჩხრიკა ორუჯოვის სახლი და ოფისი, მოგვიანებით — მანქანა.

ერთი კვირაა გასული მას შემდეგ, რაც "აბზასმედიას" დირექტორი, ულვი ჰასანლი, დირექტორის მოადგილზე — მაჰამედ კეკალოვი და მთავარი რედაქტორი, სევინჯ ვააგიფგიზი დააკავეს. სამივე მათგანს კონტრაბანდაში ედება ბრალი და დამტკიცების შემთხვევაში, 8-წლიანი პატიმრობა ემუქრება.

კანალ 13 დამოუკიდებელი ონლაინ ტელევიზიაა, რომელიც "იუთუბზე" გადაიცემა და პოლიტიკასა და სოციალურ საკითხებს აშუქებს.

ორუჯოვი 2017 წელსაც დააკავეს, მას ბრალი დასდეს კომპანიის დარეგისტრირების გარეშე მართვასა და ძალაუფლების ბოროტად გამოყენებაში. მას 6-წლიანი პატიმრობა მიუსაჯეს, თუმა მომდევნო წელს პრობაციით გამოუშვეს, მას შემდეგ, რაც უზენაესმა სასამართლომ უკანონო მეწარმეობის ბრალდებისგან გაათავისუფლა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.