თბილისის წიგნის დღეები ექსპო ჯორჯიას ორგანიზებით, წიგნების მოყვარულებს 10-12 ნოემბერს მე-11 პავილიონში უმასპინძლებს. მომხმარებელს შესაძლებლობა ექნება, შეიძინონ მათი საყვარელი ავტორების, გამომცემლობებისა და მაღაზიების წიგნები თუ პროდუქცია ფასდაკლებით. ამასთან, ისარგებლონ სპეციალურად მათთვის შექმნილი შეთავაზებებით.

წელს თბილისის წიგნის ფესტივალის გენერალური სპონსორია საქართველოს ბანკი. შესაბამისად, სტუდენტური ბარათით და sCool Card-ით საქართველოს ბანკის ტერმინალზე გადახდისას მომხმარებლები სპეციალური ქეშბექით ისარგებლებენ. რაც ნიშნავს იმას, რომ მათ 2-3 სამუშაო დღეში გადახდილი თანხის 30% (მაქსიმუმ 50 ლარი) საკუთარ ანგარიშზე დაუბრუნდებათ.

თუმცა, სანამ წიგნის დღეები დაიწყება, ალექსანდრე ლორთქიფანიძე რამდენიმე რჩევას გვიზიარებს, რაც მრავალფეროვან წიგნებს შორის არჩევანის გაკეთებას გაგიმარტივებთ და დაგეხმარებათ, იპოვოთ თქვენზე მორგებული წიგნები.

თუ თქვენ ჯერ არ იცნობთ კარგად ქართულ ლიტერატურას, მაგრამ გსურთ პირველი ნაბიჯები გადადგათ და თანამედროვე ქართულ რომანს ეძებთ...

რომანი, რომლითაც თანამედროვე ქართულ ლიტერატურას შევაყვარებდი ადამიანს, არის აკა მორჩილაძის სანტა ესპერანსა. ვფიქრობ, ეს წიგნი თანამედროვე საქართველოს დაბადებაზეც ბევრს ამბობს.

აუცილებლად წასაკითხი ახალი თარგმანები...

რამდენიმე წიგნს გამოვარჩევ: კლერ კიგანის ასეთი წვრილმანები ჩემთვის ბოლო დროის ერთ-ერთი აღმოჩენაა, ძალიან მაინტერესებს ნაჯიბ მაჰფუზის გზა, რადგან ეს ერთ-ერთი ყველაზე განსხვავებული და თავისებური ავტორია თანამედროვე მსოფლიო ლიტერატურაში, ასევე აღსანიშნავია სესარ აირას კრებული, ამ ავტორის გაცნობა ქართულ ენაზე პირველად შეგვიძლია.

გამორჩეული დებიუტანტი ან ახალგაზრდა ქართველი მწერლის წიგნი…

ამ მხრივ ეს წელი უხვად დახუნძლული აღმოჩნდა, ჩემთვის ყველაზე შთამბეჭდავი იყო თამარ ფოლადაშვილის ძვლების წიგნი, გოგა ქობალიას ჩემი ყანა გადაიქცა მერცხლად და ივა ფეზუაშვილის მასკარაფონე.

თქვენი ბოლო დროის აღმოჩენა.

არც ისე ახალია, მაგრამ ბოლო დროს აღმოვაჩინე და ყველას ვურჩევ ჰანა არენდტის წიგნის აიხმანი იერუსალიმში წაკითხვას.

დაუფასებელი მოთხრობების კრებული…

ალბათ, ერთ-ერთი საუკეთესო კრებული რაც წამიკითხავს ქართულ ლიტერატურაში, კოტე ჯანდიერის კონკიას ღამე.

რაც შეეხება ჟანრულ ლიტერატურას…

ჟანრული ლიტერატურა ჩემი საყვარელი სამყაროა და მახარებს, რომ საქართველოშიც დაიწყო ძვრები ამ მიმართულებით, ამიტომ ყველას ვურჩევ ფენტეზის.