დეტალები: დღეს, 50-ზე მეტმა არასამთავრობო ორგანიზაციამ გაავრცელა ერთობლივი განცხადება, რომელშიც ხელისუფლებას მოსამართლეებისა და ყოფილი მთავარი პროკურორის სანქცირებაზე რეაგირებისკენ მოუწოდებენ. იმავე განცხადებაში, ორგანიზაციები აღნიშნავენ, რომ ეროვნულმა ბანკმა სანქციების აღსრულების წესი აშშ-ს მიერ სანქცირებულ ფარცხალაძეს მოარგო.

• სებ-ი NGO-ების განცხადებას უსაფუძვლოს უწოდებს და ამტკიცებს, რომ ის "მიზნად ისახავს არა მხოლოდ ქვეყნის ცენტრალური ბანკის, არამედ მთელი საბანკო სისტემის დისკრედიტაციას".

რატომ არის მნიშვნელოვანი: გავრცელებულ განცხადებაში ორგანიზაციები აცხადებენ, რომ:

• საქართველოს ხელისუფლების მხრიდან ქმედითი შემხვედრი ნაბიჯები არ მოჰყოლია აშშ-ის მიერ, მოსამართლეების — მიხეილ ჩინჩალაძის, ლევან მურუსიძის, ირაკლი შენგელიას, ყოფილი მოსამართლის ვალერი ცერცვაძის და ყოფილი მთავარი პროკურორის, ოთარ ფარცხალაძის სანქცირებას.
• საპირისპიროდ, სანქცირების მომენტიდან დღემდე, ხელისუფლება აქტიურად იცავს მათ ინტერესებს, უგულებელყოფს კანონმდებლობას და ანტი-დასავლური პროპაგანდის წარმოებით ცდილობს გააუფერულოს სანქცირებით გამოწვეული ნეგატიური შედეგები.

ორგანიზაციები მიიჩნევენ, რომ სანქცირების ორივე შემთხვევა საგანგაშო მიზეზებით მოხდა, რადგან:

• მრავალი წელია, ქართული საზოგადოება საქართველოს სასამართლოს სისტემაში კორუფციის და პოლიტიკური ინტერესების არსებობაზე საუბრობს. ამერიკის სახელმწიფო დეპარტამენტის მიერ, 5 აპრილს, კორუფციულ საქმიანობაში ჩართულობისთვის მოსამართლეების სანქცირება ამ კუთხით კიდევ ერთი მნიშვნელოვანი მტკიცებულებაა.

ორგანიზაციები ფარცხალაძის ფაქტორზე:

• "საზოგადოებისთვის ცნობილი იყო ოთარ ფარცხალაძის არაფორმალური გავლენების შესახებ საქართველოს პოლიტიკურ თუ ბიზნეს სფეროებზე. მის მიმართ სამართალდამცავების ლოიალური დამოკიდებულება გამაოგნებელი იყო. წლების მანძილზე მისი სახელი არაერთ დანაშაულებრივ ქმედებას უკავშირდებოდა, თუმცა მისთვის შესაბამისი პასუხისმგებლობა არცერთ საქმეზე არ დამდგარა.
• 14 სექტემბერს კი აშშ-ის ხაზინის მიერ გავრცელებულ განცხადებაში, ამ ყველაფერს რუსეთის სპეცსამსახურების სასარგებლოდ საქმიანობის ბრალდებაც დაემატა. სამართალდამცავებს ამ საკითხზე ეფექტიანი რეაგირება არ მოუხდენიათ, უფრო მეტიც, მათ ოთარ ფარცხალაძეს საშუალება მისცეს ქვეყანა დაეტოვებინა.
• აშშ-ის მიერ დაწესებულ სანქციებს არამხოლოდ რეაგირება არ მოჰყოლია, არამედ, ეროვნული ბანკის პრეზიდენტის მოვალეობის შემსრულებელმა, ნათია თურნავამ სანქციების აღსრულების წესი რუსეთის სპეცსამსახურებთან თანამშრომლობაში ბრალდებულ ყოფილ მთავარ პროკურორს მოარგო, რაც სახელმწიფოს მიტაცების, ქმედებაში გამოხატული, კიდევ ერთი კონკრეტული მაგალითია", — აცხადებენ ისინი.

რისკენ მოუწოდებენ მთავრობას?

• შეწყვიტოს სანქცირებული პირების ინტერესების დაცვა და ამით ქვეყნის დასავლური სივრცისგან დაშორება,
• ადეკვატური რეაგირება მოახდინოს და კონკრეტული ნაბიჯები გადადგას სანქცირების ფაქტით ქვეყნისთვის მიყენებული ზიანის გამოსასწორებლად.