მოკლედ: ღაზის სექტორში ცეცხლის დროებითი შეწყვეტის შესახებ შეთანხმება მიღწეული არ არის, ამბობს ისრაელის პრემიერ-მინისტრის ოფისი.

დეტალები: ცნობა ცეცხლის დროებითი შეწყვეტის შესახებ, თავდაპირველად, დღეს, 16 ოქტომბერს, სააგენტო როიტერსმა, ეგვიპტელ მაღალჩინოსნებზე დაყრდნობით გაავრცელა.

  • დროებითი ზავის მიზანი უნდა ყოფილიყო ეგვიპტესთან დამაკავშირებელი რაფას გამშვები პუნქტის გახსნა. ის მდებარეობს ღაზის სამხრეთით, ეგვიპტის საზღვართან.
  • როიტერსი წერდა, რომ ცეცხლის შეწყვეტის შესახებ შეთანხმება ძალაში იქნებოდა 16 ოქტომბერს, ადგილობრივი დროით 09:00-დან 18:00-მდე.

რატომ არის მნიშვნელოვანი: ღაზას სახმელეთო საზღვარი მხოლოდ ეგვიპტესა და ისრაელთან აქვს.

  • იმის გამო, რომ ისრაელმა ყველა გამშვები პუნქტი დაბლოკა, ახლა რაფა ღაზის სექტორისთვის ერთადერთი გზაა, საიდანაც ჰუმანიტარული დახმარების მიღება და, ასევე, მოსახლეობის ევაკუაციაა შესაძლებელი.
  • მდგომარეობა ღაზის სექტორში მოსახლეობისთვის სულ უფრო უარესდება — პრობლემაა სასმელი წყალი, საკვები, ელექტროენერგია და მედიკამენტები.
  • გაერო შიშობს, რომ ათასობით პაციენტის სიცოცხლე რისკის ქვეშ დადგება, რადგან საწვავის რეზერვი ღაზის ყველა საავადმყოფოში იკლებს.

სტრიქონებს შორის: ეგვიპტე რაფას გამშვები პუნქტის გახსნას მკაცრად კრძალავდა, რადგან ურთიერთობა ჰამასსა და ეგვიპტეს შორის საკმაოდ დაძაბულია.

  • გუშინ, 15 ოქტომბერს, ეგვიპტის მაღალჩინოსნებთან მოლაპარაკების შემდეგ, აშშ-ის სახელმწიფო მდივანმა, ენტონი ბლინკენმა, განაცხადა, რომ ღაზის სექტორში ჰუმანიტარული ტვირთის შესატანად გამშვები პუნქტი გაიხსნებოდა, თუმცა კონკრეტული დრო არ დაუსახელებია.

კონტექსტი: ისრაელის თავდაცვის ძალების ინფორმაციით, ღაზის ჩრდილოეთი ნაწილი უკვე 500 000-მდე ადამიანმა დატოვა, მას შემდეგ, რაც ისრაელმა მოსახლეობას ევაკუაციისკენ მოუწოდა.

  • 7 ოქტომბერს ჰამასმა ისრაელზე უპრეცედენტო და სრულიად მოულოდნელი შეტევა დაიწყო - სარაკეტო დარტყმების პარალელურად, ჰამასის მებრძოლები ისრაელის ტერიტორიაზე გადავიდნენ, თავს დაესხნენ ღაზა-ისრაელის საზღვრის ნაწილში მიმდინარე მუსიკალური ფესტივალსაც და ასეულობით ადამიანი დახოცეს, ნაწილი კი მძევლად აიყვანეს.
  • ისრაელმა კონტრშეტევა დაიწყო, რასაც ასევე ასეულობით პალესტინელი ემსხვერპლა.
  • ისრაელში საომარი მდგომარეობა გამოცხადდა — მათ ღაზას ელექტროენერგიის, საკვების, წყლისა და საწვავის მიწოდება შეუწყვიტეს.