მალტაში, სადაც განქორწინების ლეგალიზაცია 2011 წელს მოხდა, 6 წლის შემდეგ ერთნაირსქესიანთა ქორწინების დაკანონებას ვარაუდობენ. საკანონმდებლო ორგანო კანონპროექტს ხვალ, 6 ივლისს, უყრის კენჭს. ინფორმაციას BBC ავრცელებს.

"ჩვენ გვინდა ვიყოთ ლიდერები ლგბტ თემის პრობლემების მოგვარების საკითხში და ასევე სხვა სამოქალაქო თავისუფლებების კუთხით, ჩვენ გვინდა ვიყოთ მაგალითი დანარჩენი მსოფლიოსთვის" - განაცხადა მალტის ახლადარჩეულმა პრემიერმა, ჯოზეფ მუსკატმა.

არჩევნების შემდგომ, ეს მისი გუნდის პირველი საკანონმდებლო ინიციატივაა. ახალი კანონმდებლობის მიხედვით ერთნაირსქესიან წყვილებს მიეცემათ ყველა ის უფლება, რაც ჰეტეროსექსუალ წყვილებს გააჩნიათ, მათ შორის შვილის ყოლის უფლებაც.

კანონპროექტით ასევე გათვალისწინებულია ტერმინების "ცოლი", "ქმარი", "დედა", "მამა", გენდერულად ნეიტრალური ტერმინებით შეცვლა, ინიციატივის სწორედ ამ ნაწილმა გამოიწვია კრიტიკა შიდა პოლიტიკურ წრეებში.

მიუხედავად იმისა, რომ საკანონმდებლო პროექტს პარლამენტი დიდი ალბათობით მიიღებს, არიან ისინიც, ვინც მას ეწინააღმდეგებიან და "ზედმეტად პროგრესულად" აფასებენ. მათ შორისაა ნაციონალისტური პარტიის ლიდერი დევიდ აგიუსი:

"ამ დღის შემდეგ, ჩვენ მშობლებს დედას და მამას ვეღარ დავუძახებთ, რადგან კანონში ეს არ ეწერება. დედის დღის აღნიშვნის ნაცვლად, რას ავღნიშნავთ? ადამიანის დღეს, რომელმაც გააჩინა ბავშვი?"

მას შემდეგ რაც მალტა 2004 წელს ევროკავშირში გაწევრიანდა სახელმწიფომ რადიკალური სოციალური ცვლილებები განიცადა. შეგახსენებთ, რომ მალტაში განქორწინების ლეგალიზაცია მხოლოდ 2011 წელს მოხდა.

ქვეყანაში ყოველთვის ძლიერი იყო კათოლიკური ეკლესიის გავლენა და კონსერვატორული განწყობები, თუმცა ამ ნაბიჯით, მალტა მსოფლიოს იმ მოწინავე ქვეყნების რიგებს შეუერთდება, სადაც უკვე მოხდა ერთნაირსქესიანთა ქორწინების ლეგალიზაცია. შეგახსნებთ რომ, გასულ კვირაში იგივე გადაწყვეტილება მიიღეს გერმანიაშიც.