ხამზატს რაც შეეხება, ის არის მსოფლიოში ერთ-ერთი წარმატებული სპორტსმენი. მე მასთან ვმეგობრობ, ძალიან კარგი ურთიერთობა მაქვს, — ამის შესახებ კახა კალაძემ თბილისში ხამზატ ჩიმაევის ვიზიტზე კომენტირებისას განაცხადა. მისი თქმით, ის მეგობრებს პოლიტიკური ნიშნით არ არჩევს.

"ხამზატს რაც შეეხება, ის არის მსოფლიოში ერთ-ერთი წარმატებული სპორტსმენი. მე მასთან ვმეგობრობ, ძალიან კარგი ურთიერთობა მაქვს. მიხარია, რომ ასეთი წარმატებული სპორტსმენები სტუმრობენ ჩვენს დედაქალაქს, ჩვენს ქვეყანას. მიზანი არაფერი, ტურისტულად ჩამოვიდა საქართველოში და მომავალში კიდევ მეტი ადამიანი ჩამოვა.

ჩვენ პოლიტიკური შეხედულების გამო არ ვმეგობრობთ. მე არავისთან არ ვმეგობრობ პოლიტიკური შეხედულების გამო. მყავს მეგობრები, თუნდაც ქვეყნის შიგნით, ვისაც შეიძლება ჰქონდეს განსხვავებული პოლიტიკური შეხედულება. ეს ვერ იქნება განმსაზღვრელი - მე ვინმესთან ვიმეგობრებ, ან არ ვიმეგობრო", — განაცხადა კახა კალაძემ თბილისში ხამზატ ჩიმაევის ვიზიტზე კომენტირებისას ტვ პირველთან.

კახა კალაძე და ხამზატ ჩიმაევი

კახა კალაძე და ხამზატ ჩიმაევი

ჩიმაევი შერეული საბრძოლო ხელოვნების (MMA) მებრძოლი და ჩეჩნეთის ლიდერ რამზან კადიროვთან დაახლოებული პირია. ხამზატ ჩიმაევმა 23 დეკემბერს Instagram-ზე კახა კალაძესთან გადაღებული ფოტოები გამოაქვეყნა, მოგვიანებით ფოტოები კალაძემაც გააზიარა. ფოტოებიდან ჩანს, რომ კალაძემ ჩიმაევს თავისი საფეხბურთო მაისური აჩუქა.

ხამზატ ჩიმაევი და ახმედ კადიროვი

ხამზატ ჩიმაევი და ახმედ კადიროვი

"საქართველო, მადლობა თბილი მიღებისთვის", — წერს ჩიმაევი სოციალურ ქსელში.

კალაძის გარდა ჩიმაევი შეხვდა ოცნების წევრ ოლიმპიურ ჩემპიონ გენო პეტრიაშვილსა და ოლიმპიურ ჩემპიონ ძიუდოისტ ლაშა ბექაურს.

ხამზატ ჩიმაევი და ქართველი ოლიმპიელები

ხამზატ ჩიმაევი და ქართველი ოლიმპიელები