26 დეკემბერს, 19:00 საათზე თბილისში ბათუმელების მარში გაიმართება. მსვლელობა ბუკიას ბაღიდან დაიწყება და შეკრებილები პარლამენტის შენობისკენ წავლენ.

სოციალურ ქსელში გავრცელებულ ინფორმაციაში ნათქვამია, რომ ამ მარშით "ათასობით ბათუმელის ხმას გააერთიანებენ, ვისთვისაც ევროპული ღირებულებები — დემოკრატია, თავისუფლება, კანონის უზენაესობა და ადამიანის უფლებების პატივისცემა".

"ძვირფასო თანამოქალაქეებო და ევროპული ღირებულებების მხარდამჭერებო!

გიწვევთ მარშზე, სადაც ბათუმელები ერთხმად გამოვხატავთ ჩვენს მტკიცე ნებას — გავხდეთ ევროპული ოჯახის სრულუფლებიანი წევრები.

ბათუმი ოდითგანვე იყო მულტიკულტურული ქალაქი, სადაც სხვადასხვა ეროვნების, რელიგიისა და კულტურის ადამიანები მშვიდობიანად თანაცხოვრობდნენ. ჩვენი ქალაქის ისტორია — ეს არის ტოლერანტობის, კულტურათა დიალოგისა და პროგრესული აზროვნების ისტორია.

დღეს, როდესაც საქართველო დგას ისტორიული არჩევანის წინაშე, ჩვენ, ბათუმელები, კიდევ ერთხელ ვადასტურებთ ჩვენს მტკიცე ევროპულ იდენტობას. ეს არ არის მხოლოდ პოლიტიკური არჩევანი - ეს არის ჩვენი გენეტიკური კოდი, ჩვენი წინაპრების მემკვიდრეობა და ჩვენი შვილების მომავალი.

მარშის დროს გავაერთიანებთ ხმას იმ ათასობით ბათუმელის სახელით, ვისთვისაც ევროპული ღირებულებები — დემოკრატია, თავისუფლება, კანონის უზენაესობა და ადამიანის უფლებების პატივისცემა წარმოადგენს ცხოვრების განუყოფელ ნაწილს.

თარიღი: 26 დეკემბერს

დრო: 19:00

შეკრების ადგილი: თბილისი, ბუკიას ბაღი

მარშრუტი: პარლამენტამდე", — ნათქვამია გავრცელებულ ინფორმაციაში.