შესაძლებელია ახალი საბაგირო პროექტები განხორციელდეს ვაზისუბნის და თემქის ხევის მიმართულებით, — ამის შესახებ თბილისის მერმა, კახა კალაძემ თბილისის საკრებულოს სხდომაზე თქვა.

"იცით, რომ კვლევა გვაქვს ჩატარებული, კვლევის შედეგად 2 კონკრეტული მიმართულება არის, სადაც შესაძლებელია ახალი საბაგირო პროექტის განხორციელება. ერთი არის ვაზისუბნის მიმართულება, მეორე თემქის ხევის მიმართულება, სადაც შესაძლებელია ახალი საბაგირო პროექტების განხორციელება. იმის გათვალისწინებით, თუ როგორი იქნება ბიუჯეტის მატება მომავალი წლის განმავლობაში, ამის მიხედვით დავიგეგმებით და მივიღებთ გადაწყვეტილებას", - აღნიშნა კალაძემ.

მისივე თქმით, გამოცხადდა ტენდერი 12 მეტროსადგურის კონცეპტუალური დიზაინისა და თანამედროვე სტანდარტის 97 ერთეული ახალი ვაგონის შესაძენად.

"გამოცხადდა ტენდერი 12 მეტროსადგურის კონცეპტუალური დიზაინისა და თანამედროვე სტანდარტის 97 ერთეული ახალი ვაგონის შესაძენად. ზოგადად, მეტროსადგურების განახლება ერთ-ერთი უმნიშვნელოვანესი პრიორიტეტია. არავის მოგვწონს ის ვითარება, რაც მეტროსადგურებშია. სამწუხაროდ, ქართულ კომპანიებს პრობლემები აქვთ ამ თვალსაზრისით. ტენდერი მოგვცემს საშუალებას საერთაშორისო კომპანიებმაც მიიღონ მონაწილეობა მეტროსადგურების განახლება-რეაბილიტაციის სამუშაოებში. გამოცხადდა ტენდერი თანამედროვე სტანდარტების 98 ერთეული ახალი ვაგონის შესაძენად, დაახლოებით 200 მილიონი ევრო იქნება დახარჯული. 2019 წელს განხორციელდა 278 მილიონი მგზავრობა მეტრო-ავტობუსით, ხოლო ეს რიცხვი 2024 წელს გაიზარდა 320 მილიონამდე. ასევე 4.5-ჯერ გაიზარდა 2019 წელთან შედარებით მიკროავტობუსებში მგზავრობა, 20 მილიონიდან 84 მილიონ მგზავრამდე გაიზარდა. ყველაფერს ვაკეთებთ, რომ საზოგადოებრივი ტრანსპორტი გავხადოთ ყველასთვის ხელმისაწვდომი. ყველაზე კომფორტული იყოს. იმის გათვალისწინებით, რომ საცობები გვაქვს, საზოგადოებრივი ტრანსპორტი შეფერხებების გარეშე უნდა გადაადგილდებოდეს", — აღნიშნა კალაძემ.