აქციაზე სამართალდამცავების მიერ სასტიკად ნაცემ 21 წლის ბილალ დუიშვილს პოლიცია წვრილმან ხულიგნობას და პოლიციის მოთხოვნისთვის დაუმორჩილებლობას ედავება. მისი ადმინისტრაციული საქმის სასამართლო პროცესი 27 იანვარს ჩაინიშნა.

გავრცელებული ინფორმაციით, 4 დეკემბერს, პანკისელი სტუდენტი პროევროპულ საპროტესტო აქციაზე მეგობართან ერთად იმყოფებოდა, როდესაც პოლიციის მხრიდან დემონსტრანტების მორიგი დარბევის დროს, სპეცრაზმელების ალყაში მოჰყვა, რის შემდეგაც ის დაიჭირეს და სცემეს.

მომხდარის შესახებ დეტალებს "პუბლიკასთან" ინტერვიუში ახალგაზრდას ადვოკატი, "სოციალური სამართლიანობის ცენტრის" იურისტი, მარიამ ყველაშვილი ჰყვება.

"ბილტმორთან” სპეცრაზმელების ალყაში მოხვდა. დააკავეს, სპეცრაზმელები იქვე ურტყამდნენ და მოკლე ვიდეო გვაქვს, როგორ წაიყვანეს. წაიყვანეს, როგორც კი შეიყვანეს პოლიციის ფურგონში. ყვება, რომ პოლიციელები მანქანაში ადიოდნენ და სცემდნენ.

წაართვეს ტელეფონი და საფულე", — ამბობს იურისტი.

ადვოკატი აღნიშნავს, რომ ბილალს ზუსტად არ ახსოვს, რა დრო გაატარა მანქანაში, ასევე არ იცის, ზუსტად სად წაიყვანეს, მანვე აღნიშნა, რომ პოლიციის განყოფილებაში ახალგაზრდას მიყვანისთანავე შეიყვანეს აბაზანაში, რათა სისხლი ჩამოებანათ.

"როცა აბაზანიდან გამოიყვანეს, იმდენად ცუდად იყო, იქვე შეადგინეს ოქმი, ჩაუწერეს, რომ იგინებოდა პოლიციელების მიმართულებით და გადაიყვანეს ცენტრალურ ჰოსპიტალში. ჰქონდა ცხვირის მოტეხილობა, ტვინის შერყევა, მრავლობითი დაჟეჟილობა. 5 დღე იყო საავადმყოფოში. ვერ გადაიყვანეს იზოლატორში და მერე შეიტანეს საქმე სასამართლოში", — ამბობს მარიამ ყველაშვილი.

ცნობისთვის, პოლიცია ნაცემ დემონსტრანტს წვრილმან ხულიგნობას (ადმინისტრაციული კოდექსის 166-ე მუხლი) და პოლიციის მოთხოვნისთვის დაუმორჩილებლობას ედავება (ადმინისტრაციული კოდექსის 173-ე მუხლი).

მარიამ ყველაშვილის თქმით, ბილალ დუიშვილმა მიმართა სპეციალურ საგამოძიებო სამსახურსაც. დაწყებულია გამოძიება და დუიშვილი დაზარალებულად არის ცნობილი.