TV პირველის ინფორმაციით, დინამოს სტადიონის ტერიტორიაზე მდებარე ფიტნეს-დარბაზ "ასპრიაში" ნიღბიანი პირები შეცვივდნენ.

დაახლოებით 100-მდე ადამიანი ადგილზე კონკრეტულს პირს, გიორგი უბილავას ეძებდა და მისი მისამართით იგინებოდა. მოქალაქეებს, ვინც ამ ფაქტის გადაღებას ტელეფონით ცდილობდა, ფიზიკურად გაუსწორდნენ.

TV პირველის ინფორმაციით, გიორგი უბულავა ქვემო ქართლის გუბერნატორის, გიორგი შინჯიკაშვილის მოადგილეა.

NEWS.On.ge ფიტნეს-დარბაზ "ასპრიას" დაუკავშირდა. როგორც ცხელ ხაზზე აცხადებენ, გავრცელებული ინფორმაცია სიცრუეა და სიმართლეს არ შეესაბამება. NEWS.On.ge-მ დეტალების გასარკვევად შინაგან საქმეთა სამინისტროსაც მიმართა, უწყებაში ჯერჯერობით კომენტარს არ აკეთებენ.

პასუხის მიღების შემთხვევაში მასალა განახლდება.

განახლება: მოგვიანებით სოციალურ ქსელში განცხადება გაავრცელა "ასპრია ფიტნესმა", ისინი გავრცელებულ ინფორმაციას სიცრუეს უწოდებენ.

"მაღალი საზოგადოებრივი ინტერესიდან გამომდინარე ვავრცელებთ განცხადებას, რომ სოციალურ ქსელში გავრცელებული ინფორმაცია ასპრია ფიტნესის ინვენტარის დაზიანების შესახებ არ შეესაბამება სიმართლეს.

ასპრია ფიტნესის დინამოს ფილიალში არის სიმშვიდე და მომხმარებლები ჩვეულ რეჟიმში განაგრძობენ ვარჯიშს." — ნათქვამია განცხადებაში.