ქალაქის მერის, კახა კალაძის თქმით, სალომე ზურაბიშვილის შესაძლო დაპატიმრება შეიძლება უკავშირდებოდეს ხელისუფლების მითვისების დანაშაულს. ამის შესახებ მან ოცნების პრემიერმინისტრ ირაკლი კობახიძის განცხადებაზე კომენტირებისას განაცხადა.

"ჩვენ არავის დაპატიმრებას არ ვაპირებთ. თუ ვინმე ჩაიდან დანაშაულს, ამას არ აქვს მნიშვნელობა, თანამდებობა ვერ იქნება რაღაც ფარი იმისა, რომ შენ ჩაიდინო დანაშაული. არ აქვს მნიშვნელობა, სალომე ზურაბიშვილი იქნება, თუ სხვა ნებისმიერი ქვეყნის მოქალაქე, ვინც ჩაიდენს დანაშაულს, ამ შემთხვევაში, თუ სალომე ზურაბიშვილის ჩაიდენს დანაშაულს, რა თქმა უნდა, ამას მოჰყვება სამართლებრივი რეაგირება და ვერაფერი შეაჩერებს ამ პროცესს", — განაცხადა კალაძემ.

კითხვას, რა დანაშაული შეიძლება ჩაიდინოს სალომე ზურაბიშვილმა, კალაძემ უპასუხა: "არ ვიცი, მითვისებაზე...“

"ეს არის ხელისუფლების მითვისებასთან დაკავშირებით. ამასთან დაკავშირებით პრემიერ-მინისტრმა გააკეთა ბრიფინგი და ძალიან ვრცლად იყო განცხადებები გაკეთებული იმასთან დაკავშირებით, თუ რა შემთხვევაში მოხდება და გადაიდგმება ეს ნაბიჯი. კანონის დარღვევა, ჩვენ კი, შეიძლება მიჩვეულები ვართ მისი მხრიდან კონსტიტუციის დარღვევას, მაგრამ კანონის დარღვევას არ ვაპატიებთ არავის, ამას ყოველთვის მოჰყვება რეაგირება. ჩვენ ვართ შემდგარი სახელმწიფო, დემოკრატიული სახელმწიფო და ყველამ კეთილი უნდა ინებოს, პატივი ვცეთ, როგორც კონსტიტუციას, ასევე კანონს. რაც შეეხება არჩევნებს, არჩევნები აუცილებლად ჩატარდება ამ ქვეყანაში. ჩვენ მომავალ წელს გვაქვს ადგილობრივი თვითმმართველობის არჩევნები. რაც შეეხება საპარლამენტო არჩევნებს გაიმართება 2028 წელს. კონკრეტული თარიღი, როდის იქნება, ამას ცოტა მოგვიანებით ვეტყვით საზოგადოებას იმიტომ, რომ ჯერ ადრეა ამაზე საუბარი", — განაცხადა კახა კალაძემ.

შეგახსენეთ, რომ ოცნების პრემიერმა, ირაკლი კობახიძემ 22 დეკემბერს განაცხადა, რომ "სალომე ზურაბიშვილს 29 დეკემბერს მოუწევს თანამდებობის დატოვება. ვნახოთ, სად გააგრძელებს ცხოვრებას, გისოსებს მიღმა, თუ გარეთ".