ფუნდამენტურად ნაკლოვანი ვინც არის, ეს IRI-ია. მთელი მისი მოღვაწეობა არის ფუნდამენტური ნაკლოვანი, – ასე გამოეხმაურა თბილისის მერი, კახა კალაძე საერთაშორისო ორგანიზაციის, IRI-ს დასკვნას.

მისი თქმით, საერთაშორისო რესპუბლიკური ინსტიტუტი რეპუტაცია შელახულია.

"ფუნდამენტურად ნაკლოვანი ვინც არის ეს - IRI-ს ორგანიზაციაა, მთელი მისი მოღვაწეობა არის ფუნდამენტური ნაკლოვანი. 2012 წლიდან ეს ორგანიზაცია ასოცირდებოდა გაყალბებასთან და სიცრუესთან. გვახსოვს, ჩვენ მათ მიერ ნაჩვენები კვლევები, 2012 წელს რა შედეგებს დებდნენ არჩევნების განმავლობაში. ეს ორგანიზაცია რეპუტაცია შელახულია და ეს პირველ რიგში, აქ მომუშავე მათი თანამშრომლების დამსახურებაა", — განაცხადა კახა კალაძემ.

შეგახსენებთ, საერთაშორისო რესპუბლიკურმა ინსტიტუტმა საქართველოში ჩატარებულ საპარლამენტო არჩევნებთან დაკავშირებით საბოლოო ანგარიში გამოაქვეყნა;

IRI წინასაარჩევნო პერიოდსა და უშუალოდ არჩევნების დღეს მრავალ ფართომასშტაბიან დარღვევაზე მიუთითებს;

IRI-ის პრეზიდენტი მარკ ტვინინგი საბოლოო ანგარიშში აღნიშნავს, რომ "საქართველოში ჩატარებული საპარლამენტო არჩევნები მოქალაქეების თვალში სარწმუნო არ ყოფილა და ქვეყნის მიერ თავისუფლებისა და დემოკრატიისთვის ბრძოლაში სამწუხარო თავს აღნიშნავს. ხელისუფლების ლეგიტიმურობის მიმართ ქართველი ხალხის ნდობის აღდგენა მხოლოდ ახალ არჩევნებს შეუძლია".