რატომ არის მნიშვნელოვანი: გასულ წელს უკრაინამ წარმატებული კონტრშეტევა განახორციელა და რუსული ძალები კიევიდან ჩრდილო-აღმოსავლეთის, ასევე, სამხრეთით, ხერსონის რეგიონის ტერიტორიებზე დაამარცხა.

  • ოკუპანტები კვლავ იკავებენ აღმოსავლეთის, სტრატეგიულად მნიშვნელოვანი სამხრეთისა და ყირიმის ნახევარკუნძულის ნაწილებს.
  • მორიგი კონტრშეტევა უკრაინამ ზაფხულში წამოიწყო — ოფიციალური პირები ფრონტის ხაზზე გარკვეულ წინსვლაზე საუბრობენ.
  • როგორც Forbes წერს, კონტრშეტევის 13 კვირის განმავლობაში უკრაინის არმიამ 71 ლეოპარდიდან მხოლოდ 5 დაკარგა, 10 კი დაზიანდა.
  • რაც შეეხება არმიის წინსვლას, ეს საკითხი უწყვეტი განხილვისა და კრიტიკის მიზეზი ხდება, რადგან წინა კონტრშეტევის მსგავსად, საზოგადოება სწრაფ შედეგებს ელის.
  • ნატოს გენერალურმა მდივანმა იენს სტოლტენბერგმა მოუწოდა ყველას, არ იჩქარონ დასკვნების გამოტანა უკრაინის კონტრშეტევაზე და აღნიშნა, რომ უკრაინამ არაერთხელ გადააჭარბა მოლოდინს.

სიტუაცია ფრონტის ხაზზე: აღმოსავლეთის ძალების ჯგუფის პრესსამსახურის ხელმძღვანელმა, ილია იევლაშმა განაცხადა, რომ ბახმუტის მიმართულებით 52 ათასი რუსი ჯარისკაცი, დაახლოებით 274 ტანკი, ათასზე მეტი ჯავშანტექნიკა, 150 საარტილერიო სისტემა და 120-ზე მეტი მრავალჯერადი სარაკეტო სისტემაა მობილიზებული.

  • ბოლო კვირების განმავლობაში უკრაინელმა სამხედროებმა მიაღწიეს პროგრესს რუსეთის მიერ კონტროლირებად ტოკმაკისკენ, რომელიც ამჟამად ფრონტის ხაზიდან 16 კილომეტრითაა დაშორებული — ეს მნიშვნელოვანი სტრატეგიული ქალაქია ზაპოროჟიეს რეგიონში, რომელიც უკრაინის ძალებსა და მელიტოპოლს შორისაა.
  • ომის კვლევის ინსტიტუტი წერს, რომ თავდაცვის ძალების წინსვლამ დასავლეთ ზაპოროჟიეს რეგიონში, სავარაუდოდ, აიძულა რუსეთის სარდლობა, უპირატესობა ამ რეგიონში თავდაცვაზე მიენიჭებინათ.
  • ბრიტანულმა დაზვერვამ ასევე განაცხადა, რომ რუსული ჯარები ტოკმაკის დაცვას აძლიერებენ.
  • მათი ინფორმაციით, ქალაქის ირგვლივ ამონტაჟებენ დამატებით საგუშაგოებს და ტანკსაწინააღმდეგო სიმაგრეებს, ასევე თხრიან ახალ თხრილებს რუსეთის ფედერაციის 58-ე გაერთიანებული არმიის მიერ დაკავებულ ტერიტორიაზე.
  • ნატოს გენერალურმა მდივანმა, იენს სტოლტენბერგმა განაცხადა, რომ სრულმასშტაბიანი ომი დიდხანს გაგრძელდება და ამისთვის მზად უნდა ვიყოთ.

ბოლო სიახლეები: 17 სექტემბერს მთელს უკრაინაში საჰაერო განგაში იყო გამოცხადებული.

  • ღამით მტერმა უკრაინას საკრუიზო რაკეტებით და უპილოტო საფრენი აპარატებით შეუტია — თავდაცვის ძალების თქმით, 16-დან 12 ჩამოაგდეს.
  • რაკეტები მოხვდა საწარმოს ხარკოვში და მარცვლეულის საცავს ოდესაში.
  • დღის განმავლობაში ხერსონში სამედიცინო ცენტრიც დაიბომბა.
  • თავის მხრივ რუსეთი უკრაინის მიერ მოსკოვსა და ყირიმზე თავდასხმის მცდელობაზე საუბრობს, რომელიც, მათი მტკიცებით, აღკვეთეს.
  • დრონის შესახებ ვორონეჟის ოლქის გუბერნატორმა ალექსანდრე გუსევმაც განაცხადა — მისი თქმით, დრონი ჩამოაგდეს, მსხვერპლი და ნგრევა არ ყოფილა.