რატომ არის მნიშვნელოვანი: პაპუაშვილმა დღეს ქართული ოცნების ოფისში ბრიფინგი გამართა, რომლის ძირითადი ნაწილიც მედიისა და არასამთავრობო ორგანიზაციების კრიტიკას დაუთმო.

  • კრიტიკის მთავარი ობიექტი კი კვლავ მთის ამბები გახდა და ის ყალბი ამბების გავრცელებაში დაადანაშაულა.
  • ეს გამოცემა და მისი რედაქტორი, გელა მთივლიშვილი, რომელიც პირველი იყო, ვინც შოვში სტიქიის ზონიდან ინფორმაციებს ავრცელებდა, ბოლო დღეებში თავდასხმის სამიზნე არაერთხელ გახდა.
  • სტიქიის გაშუქებისას ის მას ადგილობრივი ხელისუფლების წარმომადგენლები დაუპირისპირდნენ — ერთ-ერთი მათგანი წყალში გადაგდებითაც დაემუქრა.

მთის ამბები პაპუაშვილის განცხადებას თავდასხმად აფასებს. როგორც გამოცემა წერს, პარლამენტის თავმჯდომარეს, მთავრობასა და "ოცნებას" არ მოსწონს, რომ ისინი შოვის ტრაგედიას სტიქიური უბედურების პირველივე წუთებიდან აშუქებდნენ.

  • მიუთითებენ, რომ მედიის ვალდებულებაა, უზრუნველყოს საზოგადოების ინფორმირება, განსაკუთრებით კი კრიზიკური ვითარების დროს.
  • "ახლაც მხოლოდ ამაზე ვართ კონცენტრირებული, ხელისუფლების მიზანია მოგვაცდინონ, ყურადღება სხვა საკითხებზე გადაგვატანინონ, საზოგადოებაში კი დაბნეულობა შეიტანონ. არ ვაპირებთ, ხელისუფლებას შევყვეთ პოლიტიკურ დებატებში".
  • გამოცემა აღნიშნავს, რომ მთავრობა მათ სტიქიის ზონაში არ უშვებს, საჯარო ინფორმაციასა და დოკუმენტებზე წვდომა კი შეზღუდული აქვთ.
  • "ამის მიუხედავად, ჩვენ გავაგრძელებთ სტიქიური უბედურების მიზეზების კვლევას, დანაშაულის ნიშნების შემცველი ფაქტების გამოვლენას და საზოგადოებისთვის მიუკერძოებელი ინფორმაციის მიწოდებას".
  • გარდა ამისა, საუბრობენ იმაზეც, რომ ქართული ოცნება მთის ამბების წინააღმდეგ აგრესიულ კამპანიას აწარმოებს, რაც საფრთხეს უქმნის ჟურნალისტების ფიზიკური ხელშეუხებლობასა და პროფესიულ საქმიანობას.
  • "პარლამენტის თავმჯდომარის, საპარლამენტო უმრავლესობის ლიდერის და სხვა საჯარო პირების დაუსაბუთებელი და უპასუხისმგებლო განცხადებები ახალისებს ძალადობის სახიფათო ფორმებს. მოვუწოდებთ შესაბამის ორგანოებს, უზრუნველყონ მთის ამბების ჟურნალისტების უსაფრთხოება".