რატომ არის მნიშვნელოვანი: 20 ივლისს, ერთობლივ ბრიფინგზე შინაგან საქმეთა სამინისტრომ და პროკურატურამ ნარკორეალიზატორთა ტრანსნაციონალური ორგანიზებული დანაშაულის გახსნაზე განაცხადეს.

• სისხლისსამართლებრივ პასუხისგებაში მიცემულია დანაშაულებრივი ჯგუფის 3 ხელმძღვანელი, 2 წევრი და 16 ე.წ. "დამდები", რომელთა შორის როგორც საქართველოს, ასევე, ბულგარეთისა და თურქეთის მოქალაქეები არიან.

• პროკურატურის ცნობით, 2021-2023 წლებში ორგანიზებული ჯგუფის ქართულ საბანკო ანგარიშებზე ნარკოტიკული საშუალების შემძენებმა, ჯამში, 15 233 071 ლარი, 2 577 004 აშშ დოლარი და 10 210 ევრო ჩარიცხეს.

• მათივე ინფორმაციით, განსაკუთრებით დიდი ოდენობით უკანონო შემოსავლის ლეგალიზაცია რამდენიმე ხერხით ხდებოდა. კერძოდ, თანხის ნაწილი პირადი გადარიცხვის დანიშნულებით ირიცხებოდა ნარკოტიკული საშუალებების გამავრცელებელ პირებთან დაკავშირებულ საბანკო და ონლაინტოტალიზატორის ანგარიშებზე.

• "საქართველოში თანხის განაღდებას და შეგროვებას საქართველოს 2 მოქალაქე უზრუნველყოფდა. ბრალდებულები თანხის ნაწილს, სწრაფი ფულადი გზავნილების მეშვეობით, ასევე, საზღვარგარეთ აგზავნიდნენ; აღნიშნული ქმედებების პარალელურად, ორგანიზებულმა ჯგუფმა დაიწყო საზღვარგარეთ უძრავ-მოძრავი ქონების შეძენა", — აცხადებენ უწყებაში.

• გარდა ამისა, დანაშაულებრივმა ჯგუფმა საქართველოში დააფუძნა რამდენიმე იურიდიული პირი და განაღდებული თანხის ნაწილი ერთ-ერთი შპს-ს ანგარიშზე თავსდებოდა.

შსს-ის განცხადებით, ტრანსნაციონალური დანაშაულებრივი ჯგუფის წევრები იყვნენ მოქმედი ქართველი ადვოკატებიც.

• "ისინი განკარგავდნენ აღნიშნული ჯგუფის სარგებლობაში არსებულ საბანკო
  ანგარიშებს. ფულის წარმომავლობის დამალვის მიზნით თანხებს უცხოურ ვალუტაში აკონვერტირებდნენ და უკანონო ნარკოვაჭრობაში ჩართული პირების ანგარიშებზე რიცხავდნენ", — აცხადებენ სამინისტროში.
• მათივე ინფორმაციით, დაკავებულების პირადი, საცხოვრებელი სახლებისა და ავტომობილების ჩხრეკის შედეგად ამოღებულია დიდი ოდენობით სხვადასხვა სახის ნარკოტიკული საშუალება, ავტომობილები, ცეცხლსასროლი იარაღები, საბრძოლო მასალა, სხვადასხვა საკომუნიკაციო საშუალება, კომპიუტერული ტექნიკა და მობილური ტელეფონები, რომლებითაც ბრალდებულები ერთმანეთს უკავშირდებოდნენ.

დანაშაულები 20 წლამდე ან უვადო პატიმრობას ითვალისწინებს.

• გამოძიება საქართველოს სისხლის სამართლის კოდექსის 260-ე (ორგანიზებული ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა, შენახვა, გასაღება) და 194-ე მუხლებით (ორგანიზებული ჯგუფის მიერ უკანონო შემოსავლის ლეგალიზაცია, რასაც თან ახლდა განსაკუთრებით დიდი ოდენობით შემოსავლის მიღება) მიმდინარეობს.
• სამართალდამცავი უწყებების ცნობით, დაყადაღებულია ორგანიზებული ჯგუფის საბანკო ანგარიშები და მათზე განთავსებულ ფულად თანხები, ასევე, უძრავ-მოძრავი ქონება.