რა ხდება: ტელეკომპანია ფორმულას დაკვეთით Edison Research-მა საზოგადოებრივი აზრის გამოკითხვა ჩაატარა, რომელიც დღეს გამოქვეყნდა.

  • კვლევის სრული შედეგები, მათ შორის პოლიტიკური რეიტინგები, დღის განმავლობაში ეტაპობრივად გავრცელდება.
  • გარდა ამისა, ფორმულას განცხადებით, დღეიდან 2024 წლის არჩევნებამდე საზოგადოებრივი აზრის გამოკითხვა ყოველთვიურად გამოქვეყნდება.

რატომ არის მნიშვნელოვანი: ამ კვლევითაც დადასტურდა, რომ მოსახლეობის უმრავლესობა ევრო-ატლანტიკურ სტრუქტურებში გაწევრიანებას ემხრობა, რუსეთში კი საფრთხეს ხედავს.

  • კვლევამ აჩვენა ისიც, რომ კანდიდატის სტატუსთან დაკავშირებით პესიმისტური მოლოდინებია, თუმცა სურვილი დიდია.
  • მოსახლეობის 64% მიიჩნევს, რომ ქართული ოცნება არ აკეთებს საკმარისს ევროკომისიის მოთხოვნების შესასრულებლად.
  • ამდენივეს აზრით, ქვეყანა არასწორი მიმართულებით ვითარდება.

კანდიდატის სტატუსი: კვლევის მიხედვით, 94% ფიქრობს, რომ საქართველოს მოსახლეობა, ქართველი ხალხი იმსახურებს კანდიდატის სტატუსს. ამ მოსაზრებას მხოლოდ 6% არ ეთანხმება.

  • მოქალაქეებს ისიც კითხეს, რა მოლოდინი აქვთ 2023 წლის შემოდგომაზე კანდიდატის სტატუსის მიღებასთან დაკავშირებით:
  • 28% ფიქრობს, რომ დანამდვილებით მიიღებს;
  • 51%-ის აზრით, შესაძლოა ვერ მიიღოს;
  • 21% კი ამბობს, რომ დანამდვილებით ვერ მიიღებს.

NATO და EU: მოსახლეობის 85% მხარს უჭერს ჩრდილო-ატლანტიკურ ალიანსში საქართველოს გაწევრიანებას, მოწინააღმდეგე 15%-ა.

  • მოსახლეობის 90% კი მხარს უჭერს ევროკავშირში გაწევრიანებას, მოწინააღმდეგე მხოლოდ 10%-ა.

რუსეთი: გამოკითხულთა 86% მიიჩნევს, რომ გაუმართლებელია რუსეთის აგრესია საქართველოს მცდელობაზე, გაწევრიანდეს ევროატლანტიკურ სტრუქტურებში.

  • აღმოჩნდა ისეთი 16%, ვისთვისაც ეს გამართლებულია.
  • ასევე, 78% ფიქრობს, რომ ეროვნული უსაფრთხოება დასავლეთთან უკეთ იქნება უზრუნველყოფილი.
  • რუსეთს კი მხოლოდ 13% ასახელებს, 9%-ის აზრით კი არცერთთან.

მეთოლოდოგია: ფორმულას ინფორმაციით, კვლევა პირისპირი გამოკითხვის მეთოდით ჩატარდა.

  • შემთხვევითი შერჩევით გამოიკითხა საქართველოში მცხოვრები 1500 საარჩევნო უფლების მქონე ადამიანი (ოკუპირებული ტერიტორიების გარდა).
  • ცდომილება +/- 3% არის.
  • საველე სამუშაოები მიმდინარეობდა 25 მაისიდან 14 ივნისის განმავლობაში მიმდიანრეობდა.