კინოცენტრში მიმდინარე მოვლენებზე მოვლენებზე On.ge რეჟისორ სალომე ჯაშს გაესაუბრა. რეჟისორის თქმით, მიმდინარე პროცესები აზიანებს და საფრთხის წინაშე აყენებს ქართულ კინოს, რომელიც აღმავლობის გზაზე იყო.

"კინოწარმოება და კინოსთან დაკავშირებული პროცესები ფერხდება, გაუგებარია, რა იქნება მომავალში, რაც ერთგვარ პანიკას და დაბნეულობას იწვევს. ინდუსტრიაში ყველას გვაქვს გეგმები და ეს გეგმები დგება კითხვის ნიშნის ქვეშ, რაც თავისთავად აზიანებს ქართული კინოს რეპრეზენტაციას მსოფლიოში და მისი პოზიციების შერყევას იწვევს", — აღნიშნავს რეჟისორი.

ჯაში თვლის, რომ კინოცენტრში პროპაგანდისტი და ხელისუფლებასთან აფილირებული POSTV-ის წამყვანი ბაჩო ოდიშარიას დანიშვნა ქმნის იმის მოლოდინს, რომ გამოხატვის თავისუფლებას საფრთხე შეექმნება. რეჟისორის თქმით, ხელოვნების სხვა სფეროებში მინისტრის მიერ ხელმძღვანელების დანიშვნის უარყოფითი გამოცდილება უკვე არსებობს და თუ იგივე კინოშიც განმეორდა, კატასტროფულ შედეგს მივიღებთ.

"მნიშვნელოვანია, კინოცენტრის დირექტორი არ იყოს ერთპიროვნულად დანიშნული. ადამიანს, რომელმაც უნდა უხელმძღვანელოს კინოცენტრს, უნდა ჰქონდეს ამ სფეროში ცოდნა და გამოცდილება. შემოქმედებითი ინდუსტრიები ზოგადად სპეციფიკურია და პენიტენციური სამსახურისგან განსხვავდება. ამ ცოდნის გარეშე, უბრალოდ დილეტანტიზმია ამ სფეროს მართვა. გამოსავალი არის ის, რომ სფეროს სპეციალისტებმა უნდა აარჩიონ ახალი დირექტორი. თუ ისევ პირდაპირ მინისტრის მიერ დაინიშნება, ჩვენი გამოცდილება გვეუბნება, რომ მივიღებთ კატასტროფულ შედეგს", — ამბობს ჯაში.

რა ხდება კინოცენტრში?

14 მარტს კულტურის სამინისტრომ კინოცენტრის დირექტორი, გაგა ჩხეიძე თანამდებობიდან გაათავისუფლა. მიზეზად აუდიტის დასკვნა დაასახელა, რომლის მიხედვითაც, "ფინანსური რესურსების კანონმდებლობასთან შეუსაბამო ხარჯვის ფაქტები გამოვლინდა". პირველ ივნისს გოეთეს ინსტიტუტმა ჩხეიძე მედლით დააჯილდოვა და განაცხადა, რომ ის უკრაინის მხარდაჭერის გამო გაათავისუფლეს. კინოცენტრი ამას ვრცელი განცხადებით გამოეხმაურა, სადაც გოეთეს ინსტიტუტის საიტზე აღნიშნულ ინფორმაციას "ფარისევლური ბრალდება" და "უტიფარი სიყალბე" უწოდა. ასევე, თქვა, რომ გადაისინჯება გადაწყვეტილება ჩხეიძის დირექტორობით ჩატარებული კინოფესტივალის დაფინანსების გაგრძელებაზე. კინოცენტრის განცხადებას რამდენიმე თანამშრომელი გაემიჯნა და პოსტს სამარცხვინო უწოდა.

პირველ ივნისს ცნობილი გახდა, რომ კულტურის სამინისტრომ კინოცენტრში დირექტორის მოვალეობის შემსრულებლად დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის ყოფილი მოადგილე, კობა ხუბუნია დანიშნა. მან კინოცენტრის დირექტორის მოადგილის ორი პოსტი გააუქმა და ცენტრში რეორგანიზაცია გამოაცხადა.

13 ივნისს პროპაგანდისტული და სახელისუფლებო POSTV-ის წამყვანმა, ბაჩო ოდიშარიამ, რომელსაც გადაცემა სექსუალურ შევიწროებაში არაერთგზის მხილებულ შალვა რამიშვილთან ერთად მიჰყავს, ფორმულასთან დაადასტურა, რომ ცენტრში კინოწარმოების დეპარტამენტის უფროსის მოადგილედ დაინიშნა.

კინოცენტრში დასაქმებულები რეორგანიზაციას აღიქვამენ მინისტრ თეა წულუკიანის მცდელობად, ქართული კინო კულტურის სამინისტროს პოლიტიკური გავლენის ქვეშ მოექცეს და "კინოცენტრის ხელთ არსებული ყველა ბერკეტი კინოსექტორზე სრულმასშტაბიანი კონტროლის დამყარებისკენ მიიმართოს".

მათ კინოცენტრის ფეისბუქ გვერდზე ღია წერილიც გამოაქვეყნეს, სადაც დამოუკიდებლობის შენარჩუნებას ითხოვდნენ, თუმცა განცხადება სოციალური ქსელიდან მალევე წაიშალა.

ახლა კინოცენტრის თანამშრომლები მოითხოვენ:

  • შეწყდეს რეორგანიზაციის პროცესი, სადაც ცენტრს კონკურსის გზით დანიშნული დირექტორი არ ეყოლება;
  • კინოცენტრის დირექტორი დაინიშნოს კონკურსის საფუძველზე და არა მინისტრის ერთპიროვნული გადაწყვეტილებით;
  • დირექტორის შესარჩევი კომისია დაკომპლექტდეს კინოსექტორის წარმომადგენლებისგან.

ამავე თემაზე: