ვესტეროსი დიდ ეკრანზე გადასასვლელად ემზადება. Warner Bros.-მა განაცხადა, რომ Game of Thrones: Aegon’s Conquest-ს (სამეფო კარის თამაშები: ეიგონის დაპყრობას) კინოთეატრებში 2029 წლის 1-ელ ივნისს ვიხილავთ. ფილმის რეჟისორი ოუენ ჰარისია, ხოლო სცენარის ავტორი — ბო ვილიმონი. ეს ჯორჯ მარტინის წიგნების სერიის, ყინულისა და ცეცხლის სიმღერის პირველი ადაპტაცია იქნება სრულმეტრაჟიანი მხატვრული ფილმის ფორმატში.

პროექტის სამსახიობო შემადგენლობა ჯერჯერობით უცნობია.

სამეფო კარის თამაშების ფილმზე საუბარი უკვე 10 წელზე მეტია, ჯერ კიდევ 2013 წლიდან მიმდინარეობს. HBO ამჟამად სამეფო კარის თამაშების ორ სერიალს იღებს: დრაკონის სახლის მე-3 სეზონი ზაფხულში გამოვიდა, ხოლო შვიდი სამეფოს რაინდის მე-2 სეზონს მომავალ წელს უნდა ველოდოთ.

ფოტო: Vanity Fair

აღსანიშნავია, რომ ფილმის რეჟისორი, ოუენ ჰარისი, შვიდი სამეფოს რაინდის ეპიზოდებზეც მუშაობდა, მისი სხვა სატელევიზიო ნამუშევრები კი მოიცავს სერიალებს — Mrs. Davis და Black Mirror.

ჯორჯ მარტინმა ჯერ კიდევ 2015 წელს განმარტა, რატომ ამბობდა სამეფო კარის თამაშების სრულმეტრაჟიან ფილმზე მანამდე უარს — მას არ სურდა, რომ თავისი წიგნების მნიშვნელოვანი ნაწილები კადრს მიღმა დარჩენილიყო. გარდა ამისა, მწერალი დარდობდა, რომ ფილმი ძირითადად ისეთ პერსონაჟებზე იქნებოდა კონცენტრირებული, როგორებიც ჯონ სნოუ ან დეინერის ტარგარიენი არიან.

ასევე იხილეთ: